Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Une biele fieste
Il disc terra straniera dut sgriât al zirave intiersecantsi cu lis peraulis de cjançon mamma.
Ce biele zornade, ce biele fieste par Anute che in chê dì e leve fûr di pupil.
Al jere plui di une ore che la musiche e sunave dentri la cusine, indulà che la taule, par chê dì, la vevin metude tal mieç.
Wafers e amarets a jemplavin une guantiere sistemade dongje un biel vâs plen di flôrs di stagjon che Lino, il pari di Anute, ju veve cjapâts sù in tai prâts.
Par chê zornade la spese e jere costade un voli dal cjâf.
Nol mancjâve nuie: chinots, gasosis, daspò une butilie di vermut, chel licôr cussì dolç che Marieto, il fradi plui piçul di Anute, cul tap de stesse butilie, plui voltis al veve cerçât.
Dute ligrie ancje chê!
Ancje Rinute, rivade cui prins invidâts e jere contente: a chê fieste al jere ancje Toni, che in chê dì se al ves provât a bussâle, no lu varès parât vie.
“Pecjât che vin dome chei discs che sunin di un pieç.” si diseve Rinute fevelant di bessole “Se a vessin ancje altris cjançons, magari chês che si balin tignintsi ben strets, une volte studadis lis lûs… mi larès masse ben…”.
Cui sa, se cualchi anime buine e veve sintudis lis sôs bramis? Veiu là tal mieç dal curtîl doi zovins forest che a sgarfavin dentri un russac.
Jerin zovins che a vignivin di fûr, che a levin a scuele cul fradi di Anute, che par fâ contente sô sûr ju veve invidâts.
Dentri in chel sac, ancje se nol jere tant grant, a tignivin dutis lis lôr novitâts e la frescjece de lôr zoventût.
Dute robe che par fortune Sunte, la mame di Anute, no veve viodût. Se no di sigûr si sarès tramudade di muse, zontant il so solit coment: “cuant che si movin i zovins e soredut i students si prepare simpri la vuere.”
E non varès vût ducj i tuarts. Ancje se no volevin la vuere, chei zovins dentri in il russac a vevin bombis di vendi.
Bombis come i cjavei che ur taponavin la cope, e che Lino a pene viodûts al crodeve ancje lui di sclopâ, cui sa se pe rabie o pe vergogne di viodi chei oms deventâts come feminis.
E cuant che nissun s’al spietave di chel sac che un di lôr al tignive simpri te man, velis lis primis veris palotulis.
Sunavin i Beatles i Rollig Stones e ancje chê femine che e cjantave cuintri la vuere. E no dut al jere finît. Fur des bocjis di chei fantats plens di morbìn jessevin peraulis che disi di vuere al è pôc.. Peraulis lis lôr che se ancje par tancj in paîs e jerin un scandul a Lino no i displasevin. A jerin lis stessis che al sintive in montagne di partigjan.
Dal dut avilide, invezit, e jere Sunte. Puarete, al puest di chês bielis cjançons su la mame che a sunavin a pene tacade la fieste e scugnive scoltâ dome chel folc che ti trai che e faseve sunâ chê zoventût.
“Ise musiche chê ch’a balin chei mats? – si domandave chê femine dute avilide -.Saltin come spirtâts, o s’ingropin un cun chê altre come madracs. Vergogne,viôt li ancje Anute si fâs braçolâ come chês che si viodin tal cine.”
La plui contente, invezit, par chê biele zornade e jere Rinute. Chei fantats che vignivin di fûr, par tant ben che balant la vevin strenzude, ju veve bussâts ducj dôi.
E Toni puaret? Vere, lui non saveve balâ, ma finide la fieste, se la ves compagnade sot li stelis, une bussade e ancje dôs e sares stade ancje par lui. E chê e jere propit d‘amôr.
di Nello Malisano
#523
5 comments
Lasse une rispueste
Dutis lis contis
Biele…mmmh, no, di plui!
Nellooo! Mi atu sintude? Ma ese nostalgje di timps pasats o setu restat tant giovin e nome cui cjavei un tic blancs??? I compliments ormai no rivi plui a fatei.Ce si podiel di' a un cal ries a scrivi cusi'e che al rive a fa' rivivi chistes fiestutes come se a fos pasade nome qualchi zornade e invezit a son pasats almancul 50 agns???Continue Nello e vonde… A chei di Contecurte invezit i gionti….Bisugne veramenti tignilu stret stret che un che al sa' scrivi cussì nol podara' nassi ogni di'..Perdonaimi dal mal scrit.Mariangela de Campo
Biele conte che nus ripuarte ai nestris plui vivarôs agns de zoventût. E je simpri stade cussì. In dutis lis epochis si scugnì lassâ pas ai zovins, a son come une ruede in rive ju, e cjape sot dut ce che cjate te sô strade.
Mandi Nello e buine permanence in Friûl.
Tantis diferencis, ma il fin al jere simpri chel, vere Nelo!! Bepi
Tintine tintone…No balistu Pieri…si, si che jo bali, al è pieç ch'a ti cjali…..ce fâstu ninine, ce fâstu la sù… al è un gjat su pes scjalis ch'al côr su e jù…je Lusie vedrane cul Zef di Segnâ, je e 'l vecjo gabane si vuelin sposâ..
Al è simpri biel lei sot de conte i preseaments dai contecurtars o di cui che al lei lis contis. Al un invît a continuâ a scrivi, a cirî la poesie di chel mont che e contin. Chel mont, che par dile cun Bepi, che si ripet simpri te stesse maniere. Ma che al devente plui biel se e savin scrivilu sgarfant jenfri lis sôs storiis la sô poesie. Graciis a Mariagela, a Galliano,a Bepi e a cui che si è dismenteât di firmâsi.