2015YB L’asteroit pierdût!

A no je une conte di fantasience ma dome la croniche di ce ch’al è capitât in chescj dîs di Dicembar tal mont de astronomie. 
Il 2003 SD220 al è un asteroit ch’al ven a cjatânus di spes, jessint ch’a si fâs viodi des nestris bandis cinc voltis ogni dodis agns. Al è stât scuviert pe prime volte tal 2003, come ch’al pant il non, e intal mont sientific a lu clamin “patate” pe so forme slungjade – 2 chilometris – ch’a si viôt ancje te foto. A nus à “sivilât par dongje” la gnot di Nadâl a 11 milions di chilometris cence fânus dams, jessint che la distance e je 28 voltis che da Tiere a la Lune. A no si lu à podût viodi a voli crot e neancje cui telescopis ch’a doprin i amadôrs, par vie ch’al è passât une vore lontan di noaltris te sô corse viers il Soreli, e inalore o vin di crodi a ce ch’a nus disin i astronoms che, cui lôr argagns sofisticâts, a àn podût fotografâlu e mostrânus la sô sacume a forme di patate. La sô vignude chest an e à fât scjas par vie ch’e je capitade la gnot di Nadâl, cul plen di Lune, cun di plui dongje dal Solstizi di Unvier, insiemi cu la comete Cataline e a un altri asteroit – il 2015XX378 – une vore plui piçul. Tantis cumbinazions a an discjadenât la fantasie dai strolics che, zontant ancje l’an bisest ch’a nus spiete, a proviodaran ogni sorte di malans, par no dî la montafin par l’an ch’al ven; come se a vessin bisugne ancje di chel! 
Ma no je mighe finide chi, parcè che al varès vût di sei cun lôr ancje il 2015YB, un altri piçul asteroit ch’al varès vût di passâ ai 19 di Dicembar aes 13 e 10 minûts precisis, ma spiete ca ti spiete a no si lu à viodût. Ce isal capitât, cemût mai a no si è fât viodi? La sô scuvierte e jere stade dade fûr ai 17 di Dicembar e secont il mût di fâ de sience, che e dopre informazions di ducj i osservatoris dal mont, e je stade stimade une orbite sbaliade par colpe di disturps eletromagnetics te atmosfere. Si che duncje “o vin cjapade une scuaiade”, a disin i astronomis, “e tal tornâ a fâ i conts de orbite o vin capît che al sarès passât une vore plui lontan de Tiere di ce ch’o pensavin, e che il “claput” 2015YB a nol meretave cussì tant rivuart”.
Po ben, par cheste volte nus è lade ben a disìn noaltris incompetents, ma se a vessin sbaliât al contrari e nus fossin cjatât il “claput” fûr de puarte a cui verino di dî graciis? “Cul sbaliâ a si impare” a disin i astronoms, “Sperin ben” o disìn noaltris… parcè che jenfri i planets Mart e Jupitar a ‘nde a miârs di chei claputs li, che par fortune a àn orbitis avonde stabilis, ma al capite dispès che il bocon di Jupitar tal so passaç, cu le sô gravitât, i dedi une pocade a cualchidun mandantlu fûr de orbite, tant di fâlu scjampâ viers il Soreli e duncje ancje viers la Tiere. E alore voi vierts cjars astronomis!

di Bepi Zefon

7 coments On 2015YB L’asteroit pierdût!

  • Bepi, no dome lis robis brutis che cumbinin i oms e lis feminis di chest mont. Armaments, vueris, supierbie e dut par comandâ un su chel altri. Tus contis ancje lis robis dal cîl, des sôs stelis, dai siei planets, asteroits e vie indenant che no son di mancul sacramentadis di ce che al sucêt su la nestre tiere. Forsit al è miôr che o metedi di gnûf il bisaç su la schene e che o tornedi in Galizie a domandai la gracie, almancul par no contecurtârs, a San Jacum.

  • Bepi jo di gnot a voi di spess a controla le cjanive e il polinar ca no vignedin i malandrins a fa man basse, cumò mi tocje cjalà ancje par aiar par parami dai claputs scjasse buracjs.A part il scherç, la conte mi plas parcè dà mut di save robis che no si saveve. Lussian

  • Lussian , a ti consei di lâ fûr di gnot cu la ombrene! Ancje jo o scherçi naturâl, parcè che un cuc tal cîl a nol è mai mâl dât, baste ch'a no sedin nulis. Bepi

  • Bepo mi soi dismenteât di scrivi che mi è plasude la tô conte. Soredut il to biel furlana e lis tôs competencis come scienziât.

  • Nelo, sin bielzà tal 2016! S'a tu savessis ce ch'o vin parsore il cjâf di rotams di satelits artificiai, a no tu spietaressis nancje un moment a metiti il russaç in spale par lâ a cjatâ Sant Jacum e preâlu ch'a nus protezi. Bepi

  • O sentinelle dell'infinito, oh astronomi, che succederebbe se non avessimo voi? Mi sento più sicuro avendo dei guardiani e pure i mezzi per deviare quelle malefiche patate cosmiche
    CT

  • Al sarès miòr falis cuei, no?

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît