Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
La modernitât
Su chê lungje taule, che Berto si jere fat lassâ di so nono, indulà che une volte par contâ i fruts che si sentavin ator ator a servivin dôs mans, Berto, Sunte e Luciana si jerin sentâts dongje il barcon par mangjâ in chel toc di taule, tal cjanton, preparât dome par lôr.
Propit su chel toc di taule preparade pal gustâ, che Sunte cun tante uce e veve preparât al jere ogni ben Diu. A jerin dutis chês pitancis che fin di piçule sô mari e preparave par chê zornade di fieste che ogni an si faseve tal paîs.
Par prin, une buine mignestre di brût con tant di tortelins. No mancjave la cuesse dal dindi cuete tal for, cunin cu lis patatis, formadi, salam e la cueste che Berto al tignive di cont inte cantine, soredut par fiestis di chê fate.
In chê cusine, ancje se jerin dentri trê Cristians, tant al jeri il cidinôr, che si sintive par fin il bati des alis di une pavee che e svolave ator ator dal lampadari, simpri piât, colpe de pocje lûs che e jentrave dal barcon.
Par tant cidinôr che al jere ancje in chê stanzie al pareve propit che la cjase e fos vueide, se nol fos stât che ogni tant, jenfri un bocon e chel altri, di sintî il cinglinâ di pirons, sedons e curtìs o il lôr rumôr cuant che a sbatevin tai plats. Nuie altri.
Berto, Sunte e Luciana ancje se sentâts insiemi su la stesse taule, ognidun al jere par so cont. Il prin che cuntune man al tignive il piron e cun chê altre une taulute fate cun veri e metal, e dentri in chel folc che ti trai al cjalave une partide di balon. Robis di no crodi.
Sunte, invezit, cun chel gnûf telefonin inteligjent, comprât di cualchi zornade e cjalave il video che si jere scjamade di internet par viodi la Messe dal Pape. No veve podût viodile inte television in direte, colpe i lavôrs dal gustâ.
Luciana, la fie, intant e cjacarave, no si sa cun trops, oms o feminis ch’a fossin, fracant i dêts su la tastiere di un telefonin plui inteligjent di chel di sô mari. Di sigûr in chel slavanderi di cjacaris, e barufave ancje cul so morôs. Di chest si jere acuarte ancje Sunte, che jenfri une bocjade e une cjalade tal video dal Pape, lu veve capît viodint la sô muse tant avilide.
Tal curtîl, intant, al jere jentrât barbe Mario che di spes a chê ore si presentave, soredut tes zornadis di fieste, par bevi il cafè insiemi ai nevôts. Sintint tant cidinôr, chel om, intun prin moment, si jere spaurît. Mancul mâl che cjalant jenfri il barcon al vodût chei trê batocjos, sentâts e cidins, ognidun cjapât tal so imprest.
A viodiju in chê maniere dibot si meteve a blestemâ, ancje parcè che al jere a pene scjampât vie di cjase cence saludâ la femine, che e jere di plui di un ore che e fevelave tal telefonin.
“Mats, il mont al è fat propit di mats. Pense tu – si diseve, barbe Mario, fevelant di bessôl – in famee no si fevele plui nancje tra om e femine…, tu podis crodi alore cui fîs….. E fossial dome chest…. Ce brut mont che si fâs indenant, ognidun par so cont. Diferent di une volte che si fevelave ancje cu lis bestiis, e tai tai curtîi dal borc si sintive vuacâ i cjans, cjantâ i gjai, berghelâ une comari o vai cualchi frut. Cumò no son plui nancje chei, al somee di jessi tal cimitieri.
E cjalant dentri in chê cjase di mumiis, sintint tal cûr tante nostalgjie i pareve di jessi tornat indaûr tal timp. Si viodeve frut, sentât in chel lunc toc di taule no cuvierte da tavaie, cun i siei fradis, cuant che, finît di gustâ ducj insiemi, a intonavin une cjançon, jenfri lis blestemis dal nono, che sentât dongje dal fuc si jere impisulît.
di Nello Malisano
#504
5 comments
Lasse une rispueste
Dutis lis contis
Nelo ,la conte mi plas parce ben smicjade sui timps corints.Berto, Sunte, Luciana, no san dopra che taule,ma no je colpe lor , la colpe a è di ches tecnologjs modernis che in te lor virtualitat nus dan par difur disvuedantnus il dentri. Lussian
Ancje se ben o podin dî che l’ûs de tecnologjie nus svicine, o podaressin ancje ben dî che nus slontane. Baste viodi i trê comensâi de conte, sentâts inte lungje e grande taule di famee, che ancje se ur podeve puartâ ricuarts e suns di altris timps, a jerin cjapâts dentri dal incjantament de tecnologjie.
Nus fasarès dome ben rivâ a dai un bon ûs, o almancul cuant che o sin a taule cun altris distudâ ducj chei tramais.
Mandi Nello, un salût.
Nelo, simpri miôr e ben contade! Il nono di Berto, cjalant di adalt le so taule i sarà scjampât plui di cualchi mocul tal viodile cussì tant profanade. Ma magari cussì no a si stâ inverant ce ch'al diseve un grant vecjo ch'o ai cognossût prin de rivoluzion tecnologjiche: " Ci stiamo avviando verso un riflusso nel privato.." . Purtrop cence fâ lavorâ il propri cjâf, ma bevint fintremai a incjocâsi di ce ch'a pensi chei altris….cun tancj auguris ae nestre zoventût. Bepi
Graciis a Lussian, Galliano e Bepi i contecurârs che simpri e lein lis mês, e no dome lis mês, contis e che no mancjin mai di preseâlis. Un segn,il lôr, che mi uce a scrivi une altre. Cun di plui, ognidun, nol mancje mai, oltri al preseament, cu lis sôs savis considerazions,di fâ deventâ la stesse conte ancjemò plui biele. E dut chest al insiore la nestre ostarie di Contecurte e al fâs si che il tai che o bevin insiemi al deventedi plui gustôs.
Graciis di gnûf
Nelloooo!.. Mi atu sintude??.. ti ai let un tic in ritart. I soi perfetamenti d'acordo cun..Luciano Marinig….che tu as perfetamenti centrat il problema di dute chiste tecnologie. I compliments a Nello ormai no si gjonti plui,,,,Tu mi as fàt invezit vegni intal cjaf une storie di chi che va tant plui lontanee che podares benisim clamasi IL DIAUL INTAL CASELOT.De Campo Maria Angela