Bifiter

Passant pe statâl a retis di Pradaman o viodarês un vecjo capanon bandonât: al è une vore malandât, al plûf dentri e, di fûr, e je la jerbe alte. Une volte o jeri a vore li e mi visi di cuant che o molavin il puest di cassîr o il caricament dai scafâi di alimentârs e detersîfs par fâ un salt li di Alfeo, il magazinîr: Cuant che lui al jere a barufâ cui camioniscj, di fûr, nô si fasevin un vuiscùt… sì, parcè che al jere li, tal cabôt di Alfeo, che il vice-diretôr, d’acuardi cul nestri magazinîr, al imboscave une butilie di Seagram o di Long John. Po o davin cuatri tîrs a un balon e, come regâl par Alfeo, o tiravin cuatri pedeadis tal sô cabôt, o sieravin la puarte e o levin vie no prime di vê jemplât lis sachetis di cualchi mignon di licôr!

Intune dì di lui o lavi fûr e dentri de cele frigo, dut sudât. Finît il turno di vore, vie cjase in biciclete pai cjamps. Ta chê volte no jere la tierce corsie e dute chê speculazion. Bon, o sintivi jo un dolorut retro-sternâl ma no mi imagjinavi il piês. Bevût il gno mignon di Gin “Bifìter” o crodei di stâ miôr ma invezit la dì dopo no rivai a alçâmi dal jet, paralizât di un fuart reumatisimi. O vevi scvomençât cussì lis mês feriis!

• 

  Giovanni Nello Malisano has written: 21 di Otubar dal 2015 at 8:33 PDM Rispuint

  E brâf Milio che tu contis intun biel furlan e cuntun fregul di malinconie il timp che ti è scjampât vie. Al è biel preseâ i contecurtârs, parcè che o sai che ur plâs ancje a lôr e di sigûr ancje a ti. Cun di plui contecurte e devente une ostarie plui biele. Fasilu ancje tu, ogni tant. Dismenteavi, se ti è plasude la conte…
• 

  Anonimo has written: 21 di Otubar dal 2015 at 3:03 DM Rispuint

  Ben tornat Milio,al'è simpri plasè leiti.Lussian
• 

  Anonimo has written: 21 di Otubar dal 2015 at 4:32 DM Rispuint

  Milio, i "Bifiters" a Londre a vuardin la Tor sul Tamigji e i "Alpins" a Pradaman a podaressin vuardâ il puint su la Tor.. perdonimi la stupidagjine.. ma par bevi licôrs a no sai cui ch'al è miôr. Bepi
• 

  Anonimo has written: 22 di Otubar dal 2015 at 10:45 DM Rispuint

  ben po grassie a ducj, cheste conte al jere plui un ricuart che altri e mi plaseve contalu, podopo a si jere ducju plui matucei, ta che volte, cumò no tu la cumbinaressis
  mandi!
  Milio
• 

  Anonimo has written: 24 di Otubar dal 2015 at 6:43 DM Rispuint

  Bulo Milio! Bulade!
  CT