Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
La trombe
|
| fotografie cjolte di chi |
Zorç al continuave a sunâ la trombe:
MI-LAA MI-LA-SOL RE-SOL-FA DO-FA-MII
MI-LAA MI-LA-SOL RE-SOL-FA DO-FA-MII
MI-FAA FA-SOOL SOL-SOOL#
E il cjapitani i berlà di finîle. I austriacs a rispuindevin cuntun conciert di shrapnels.
E po a rivarin chei dal atac cui presonîrs e i barelîrs cui ferîts.
Un dai presonîrs, tenent miedi, al veve lis mans sporcjis di sanc.
Zorç al tacà ancjemò a sunâ. Nol rivave a resisti; al ripeteve chê e simpri chê… la melodie ispaniche che al veve imparât cuant che al jere in Argjentine.
Cheste volte il cjapitani no i cridà. Intun ricovar a prove di bombis al cirive di interogâ il tenent austriac ma… nie di fâ: chel nol capive nancje un fregul di talian e nol jere austriac ma polac. Cussì al disè un capelan militâr, intervignût su richieste dal cjapitani.
Alore capelan militâr e presonîr a tacarin a fevelâ par latin! Il cjapitani al faseve lis domandis par talian, il capelan al traduseve par latin e il polac al rispuindeve par latin cuntun pôc di todesc e cualchi segno. Zorç al jere tai paragjos, jessint atendent. Al scoltave curiôs, simpri cu la trombe in man.
Di fûr il conciert di trombe e di shrapnels al continuave. Altris struments a intervignivin, fusîi e mitraiis, ta chê mate babilonie.
Il presonîr al oreve lavâsi lis mans dal sanc di ferîts e moribonts curâts ta chê dì, prime di vignî cjapât dai talians.
Il capelan i disè che la aghe nete e jere razionade e masse preziose par lavâsi, e i indicà une poce pantanose tal font de trincee.
Intant Zorç al veve cambiât la melodie.
Al sunave alc di suturni! Altris soldâts a jerin tornâts indaûr dal atac; a rivavin par ultins…le vevin vude grivie: platâts intune busoche a la fin a jerin saltâts fûr profitant di un moment di recuie cu la muart stampade in muse!
Ma la musiche suturne e finì di li a pôc cuant che une bombe e cjapà in plen un setôr de trincee a pocje distance di Zorç.
Il puaret si cjatà plui tart intun ospedâl de retrovie, ferît gravementri.
Il miedi polac presonîr lu veve apene operât e il capelan militâr, propit chel che al veve fat di interprete, i stave dant la estreme unzion!
Ducj i doi si impegnavin a curâ ferîts e moribonts…
Zorç, plen di morfine, al çavariave. Ogni tant al saltave sù a berlâ… i pareve che il linzûl si movès… come se di front di lui e fos une fantasime… efiets de droghe… cui sa…
Il miedi polac al continuave a operâ. Tantis operazions no coventavin a nie… i muarts no si contavin. Tancj a jerin dai câs disperâts ma Zorç nol oreve murî…
E nol murì.
Ancje se strupiât, repeçât cence la man drete si salvà. Nol sarès plui rivât a sunâ la trombe se no cun grande fature e dome forsi cu la man çampe; ma la trombe cui sa dulà che e jere finide, sapulide di cualchi bande inte trincee…
di Checo Tam
#458
NOTIS:
La musiche de conte la cjatais achi su dropbox e o podês judâ l’autôr a capî ce musiche che e je.
16 comments
Lasse une rispueste
Dutis lis contis
PS dal aut: la conte e je vignude fûr de musiche. E je une musiche che o scoltavi tai prins agns 80 e jo o imagjini che e sedi ancjemò plui antighe. Cui di voaltris mi indicarès l'autôr? mi sa di melodie ispaniche…
CT
Forsi "Il Concerto d'Aranjuez (Concierto de Aranjuez) di Joaquín Rodrigo, scrit dal 1939
O Ophrys apifera… o cognòs ben Aranjuez, lu ai intun vieri 45 gg sunàt de magnifiche orchestre di Paul Mauriat (retro di L'amore e blu)… nol è chel. La musiche che o stoi cirint e je moderne… plui une colone sonore di film, une cjavalcade di bandoleros… no si trate di musiche classiche o neoclassiche… Firamto CT
O vevi pensât prin di dut a l'inizi dal film di Zurlini "La prima notte di quiete", 1972, la trombe soliste di Maynard Ferguson. Ma crôt ca no sei cussì.
To Ophrys: in efiets… no mi somee il style di Maynard (par chel che no lu savès il siôr in cuistion al è kel di Gonna Fly Now, soundtrack di Rocky)
Insome o sin ancjemò in alto mare… nissun nol rive a scuvierzi il titul e l'autor de musiche… /CT
Un film dal '68, "Corri uomo corri", cun Tomás Milián, teme musicâl "Fuga Dall'ovest"
https://www.youtube.com/watch?v=d_1JKrosXlQ
tant par capì se il gjenar a si vicine a chel di cirì
No, no… chi o sin propit tai agns 60, cu la musiche di Bruno Nicolai… il motîf che o cîr jo al è ancjemò plui moderni, almancul de fin dai agns 70 e scomençâ dai 80… La trombe e fâs di protagoniste, no di comprimarie e a son dai flauts in cuintricjant… disìn che se i Wall Of Voodoo a vessin fat colonis sonoris alore la musiche che o cîr e sarès lôr…
CT
Checo, ma sêstu sigûr che la musiche no sedi Apache dal grop The Shadows? Al jere un complès dai miei timps… cuant che o levi a balâ intai agns 60 dal beat… magari une versione particolâr, insome, une cover….
Abate Fària
No, Mister Abbot, no! e samee Apache ma e à cualchi note disferente. E dopo la musiche di Apache no ise nome par ghitare? No crôt che a vedin fat la vers par trombe.
CT
Cumò, ogni volte che o sînt a sunà trombis mi pâr di induvinà il teme… îr 'La Vie En Rose' forsi sunade di Armstrong… no je che, o sai, o soi sôl jentrade ta un “earworms”
Al jere un documentari naturalistic francès che e dave la Rai dal 1981 che al veve la sigle che o stoi cirint. No mi visi il titul dal program o sai dome che al leve in onde dopomisdì forsi par une fasse par fantats; a jerin dai naturaliscj che a levin ator pes forestis dal Madagascar cirint i Lemuri!
Ct
Nissun nol è inmò rivât a induvinâ l'autôr de musiche… o met in palio un cd…
CT (no Valcareggi)
O ai scoltât lis siglis di "Geo", cuant ca l'è nât cun Folco Qulici; chês di National Geographis; che di "Il mondo di Quark in onde a chei tîmps al dopo di misdì (Bach rangjiât dai The Swingle Singers); o ai cirût le sigle di "Il mondo degli animali," di Bruno Modugno, in onde sul secônd canâl tai agns '70… ma ancjemò no soi rivade a scuvierzi il busillis.
Plauso pal interessament a la orchidee! Jo o ai provât a domandâ a un sac di esperts ma nissun nol è rivât a induvinâ… scrit ancje a la rai ma cence resultât… la ricercje e continue… jo no moli!
CT
Pussibil che in 35 agns no si rivi a cjatà l'autòr di cheste musiche? Groarrrrrrrrrrrrrrrrrrrrr!!!!!!!!!!!!!!
CT
PS Judaitmi!