15 di Mai dal 2015

Partît e balon

L’alenadôr nol saveve ce fâ. Ricuperâ Gadocha infortunât o meti Bula? Inserî il fluidificant Kmiecik o lassâ Kapka? E Ostafinski? Ma cemût? Meti lui e no Gorgon? E Lato? Cemût si podevial lassâ in bancjine Lato par meti Chojnackl? Al jere un suicidi calcistic! Epûr al scugnive ubidî a lis diretivis di partît. Al veve di meti ce che i leve ben a lôr.

“Se tu i tegnis a la bancjine tu âs di fâ ce che ti dîs jo” i diseve il President de Federazion. “E je une partide impuartante chê cu la Italie… no podìn permetisi di pierdi… o vin di cualificâsi pai Europeans…”

E cussì l’alenadôr Casimiro Gorski al jere dismontât de sô 124 Polski FIAT ta chê frede matine di Unvier par fâ la ramanzine ai siei prime dal grant incuintri…

“No vês di vê pôre… ju vin za batûts une volte, propit ai mondiâi di Gjermanie, dulà che o sin rivâts prime dal Brasîl… visaitsi che o vês intor la maie cu la blancje acuile di Polonie e il ros dal sanc dai nestris muarts… visaitsi di Jan Sobiesky…”

Ma intant che al cjacarave si inacuarzeve za di vê pierdût, cun chê scuadre. Lato, cu la maie numar 15 sui zenoi, lu cjalave cuntun cidinôr che al jere une domande, e Chojnackl, fi di un dal partît, – e no dome lui – a vevin tai voi za i gôi cjapâts. Tal miêç dal campo i talians a varessin fat ce che a volevin, inutil sperâ.

Casimiro al porconâ, ma cence nominâ il partît. No i deve fastidi scugnî fâ ce che a volevin lôr. No. Ce che i devi plui fastidi nol jere il comunism, ma il fat che chel comunism, di balon, no ’nt capive un boro!

di Milio dai cjans

#452

12 comments

Anonimo has written: 16 di Mai dal 2015 at 11:17 PDM Rispuint

Une vore origjinâl cheste conte, Milio . Ma cemût ise finide la partide daspò? Bepi
Anonimo has written: 16 di Mai dal 2015 at 6:54 DM Rispuint

Cominisim? Isal un eròr di sbalgjo?
Anonimo has written: 20 di Mai dal 2015 at 9:39 PDM Rispuint

Mi somee un sogjet par un film a ûs Gudbay Lienin…
Anonimo has written: 25 di Jugn dal 2016 at 6:03 DM Rispuint

Cualchi sere fa o eri devant di un grant linzûl a viodi Italie-Eire. Insome, cui turchins bielzà prins tal giron, Bonucci – ains indaûr scualificât pes scomessis – promovût čhapitani e Conte che al va vie par čhapâ plui bêzs (si viôt che al à di metisi sù cualchi čhaveli in plui)… jo o tignivi pai manğhecartufulis blancs/verts e, cuant che Brady (no chel Brady de Giuventus ma un gnûf) al à segnât, jo o ai berlât GOAL! E si è sintût ben tal miez de platee dai talianots, dute cidinade. E cun me o vevi ančhe la bandere! Sì, parcè che o ai repertât chê di gno nono Milio che le meteve simpri fûr il 25 di avrîl e il prin di mai… ve che e sameave fate a pueste: il vert al ere deventât un smamît verdulin e il ros al ere deventât narançon!
Fuarce Irlande/Ar agaidh Eire!
(Sebastian De Contreras)
Anonimo has written: 2 di Lui dal 2016 at 6:03 DM Rispuint

Bon… vino di fà un pronostic? O disarès che i turchins e piardin cuintri il squadron alaman… e cussì nie vuvuzelas e trombetis e claxon… juste a Grao e Lignan dulà che a son i crucs, claro , no?
Mi urte che e sedi stade eliminade le mé Polonie, però…
Pronostics: in SF a van Ghermanie, France, Portugal e Galles…

(Sebastien Cointreau)
Anonimo has written: 2 di Lui dal 2016 at 8:45 DM Rispuint

ma ALORE, FURLANS? No intervignîs?
Anonimo has written: 2 di Lui dal 2016 at 10:18 DM Rispuint

A bruse un grum lâ fûr in chest mût, ma no mi sint di tirâi lis orelis a di nissun, Bepi
Anonimo has written: 9 di Lui dal 2016 at 6:15 DM Rispuint

Une biele finàl France-Portugal… lis robis a son tornadis a puest; lis meteoris Islande e Gales no proviodevi che a lessin lontan e il squadron todesc al à paiàt no dome la capele di Neuer ma ancje l'egoisim di Mueller che al cirive la glorie di bessòl e o vin viodùt dulà che al è rivàt… migo cjapà l'esempli di Pogba? Viodùt ce assist?

Sebastien Cointreau
Anonimo has written: 9 di Lui dal 2016 at 6:18 DM Rispuint

PS… doman e vinç la France… usgnot la Gjermanie e sisteme il Gales, nol baste chel neandertalian cul codin par bati i panzer! Il gno pindulin (a ùs chel dal complant Mosca) al à dit cussì:
1)France
2)Portugal
3)BRD
4)CYMRU (Gales)

Sebastien Cointreau
Anonimo has written: 9 di Lui dal 2016 at 8:08 DM Rispuint

O ai viodût Gjermanie France e a mi àn tornât iniment chei doi balonîrs di Zaza e Pellè, che s'a no vessin sbaliât, a no sai mighe cemût ch'a finive cu la France. Par gno cont si podeve fajale…. Bepi
Giovanni Nello Malisano has written: 10 di Lui dal 2016 at 11:44 PDM Rispuint

Bepi a varessin di sigûr vint nô in titul di campions
Anonimo has written: 16 di Lui dal 2016 at 6:28 DM Rispuint

Poben… il gno pindulin al à falàat e e je dute cause de rotazion de Tiere… eppur si muove… ducj si son za aromai dismenteàts de fieste dal Portugal… nome disgraciis… Pulje, Nice e cumò un altri golpe in Turchie… ma in ce mont vivìno?

Sebastien Cointreau