Fats de vite

Gjisele Dal Prât e faseve la camarele inte locande “I doi colomps”; il proprietari, Siôr Svualt Dai Cuei, al jere restât vedul da pôc.

Gjisele e jere une femine ancjemò di no scartâ, si le viodeve ben cuant che e leve e benon cuant che e tornave, gjenerose tal ridi e tal mostrâ lis sôs formis. Lis sôs viestis a vignivin fatis cun dai ritais, la tele e jere simpri pocje, par chest i vistiduts a risultavin simpri strets di vite, curts di gjambe, di manie e scjars di cuel. A taponavin pôc e a mostravin tant.

Siôr Svualt, passâts i prins timps de vedoance, al scomençà a sclarî il voli cjalant mo chi mo là. Gjisele cu la sô intuizion femenine e nulive l’odôr dal salvadi intes gnots di lune plene, ingoloside cul zûc e tacà a pandi maravee e timôr de situazion che prin no capive o no voleve capî, cun discrezion e scomençà a fufignai parsore, cence par altri dâ tal voli (pal amôr di Diu!). Cussì al scomençà chest zuiâ al gjat e ae surîs.

Une dì Gjisele e jere impegnade cu lis sôs voris di camarele, di bot e de un salt dal suston, le imbraçavin di daur cisicantji robis intune orele, risolude ma cun tante buine gracie la femine si separà, la sô muse e sflamiave tant che une bore, cun vôs ingrocjide ma dolce i disè: – Siôr Svualt, no son robis di fâ, che si ricuardi co soi une fantate! – e di li come une vampade e sparì di corse dilunc il coridôr, sclipignant virtût, integritât e desideri.

Il paron, come bon cjaçadôr che al jere, al veve pazience, par chest no si scoragjà, anzit, il dinei i stimolave ancjemò di plui la fantasie, cussì al fo intensificant chescj incuintris “casuâi” simpri in moments diferents. I motîfs a jerin plui che plausibîi, ma la femine, vive Diu no molave il pagnut… ma nancje la sperance che cu la sô strategjiche moderazion e varès vût un sboc positîf par jê.

E cussì tra sburts e slançs, vogladis e suspîrs… e rivà par fin la zornade che l’om i metè la vere in man!… di colp la fantate e deventà Siore Gjisele Dal Prât e Dai Cuei, parone di bens e di sostancis a la pâr di so marît Siôr Svualt.

I agns, si sa, a forin passant corint e cjantarins come aghe di riul schivant lis pieris. Siore Gjisele, bielzà anziane e vedue, e puartave indenant la locande “I doi colomps” tai miôr dai mûts.

E cetantis voltis sentade pe polse tai daspò misdì inda chel cjanton de verande che al cjalave viers il lât, cui voi in sfrese, i misteris de ment e vignivin a flôr e i ricuarts a sgorgolavin cun bondance, soredut pensant a chel improvîs e birbant abraç seneôs e malandrin di Siôr Svualt, e la sô tant svantade rispueste che le faseve inmò riduçâ:

– Siôr Svualt !, no son robis di fâ, che si ricuardi co soi une fantate!