Une disgracie

In chê dì, la zornade fin di buinore e jere stade cjalde. Pareve, soredut sot misdì, che il soreli al spacàs i claps. No dome il cjalt al faseve clopâ lis gjambis, cun chel scjafoiac al pareve di no tirâ flât.

Il taramot o no sai se la burascje di cualchi Sant prime di usgnot, e diseve puare mê none, e fasarà tremâ dut il paîs, cun dute le campagne ator ator. Al pareve propit di stâ intune zornade speciâl, lâ che al podeve sucedi di dut. Forsit par chest no vevin vuacât nancje i cjans di Vigji Brunel e il gjal di Margarite no si jere sintût cjantâ. Dut al pareve propit un presintiment.

Bielzà jerin passadis lis cuatri e Ferucio al veve za imbrenât il cjaval par lâ te Sesarute a cjamâ il fen. Ma cuant che dut al jere pront par partî Don – Don – Don la cjampane dal cimitieri e sunave a muart e l’aiar che al veve tacât a movi un pôc lis fueis dal cacâr al puartave chel sun di dolôr cussì net che al pareve di velis dongje. Il borc si jere fat dut scûr e grues nûi neris, bas, che al pareve di tocjâju, a lassavin colâ cualchi gote di ploie.

Chê cjampane che sunave a muart e chel timp che al dave su, a vevin smot dut il borc. Cui isal muart? ducj si domandavin cjalantsi tai voi? E si che nol steve mâl nissun. “Dome le vecje dai Drions, Mariute, cun chê bronchite, e pareve vès di lâ vie par simpri, puarete, – e diseve Ulive – ma vuê sô fie Rine mi a dit che si è dade di ca.”

Sù pe androne, spauride e cence flât, intant e jere rivave Dirce, che tornave da place. Finide la polse, subit dopo gustât, e jere lade in speçarie par comprâ lis midisinis da pression.

Tornant indaûr viers cjase si jere inacuarte che ducj a cjaminavin spedîts su la strade par Cjaurià, fermantsi fûr dal puarton dal curtîl dai Meons, lâ che tacade al fossâl e jere ferme la machine dai carabinîrs, che faseve pensâ al lis piês robis. Ce isal sucedût? E jere la domande che si fasevin ducj? Ma eco une berghelade, un non, Rino, cheste non tu vevis di fame, no me meretavi….

E eco ancjemò un urli e simpri chel non, Rino. Il non di un dai fîs di Mafalde, di lunc cun so fradi in Svuizare e a vore come muradôr. Al jere colât de armidure e restât lì, puaret, frêt come il fier di un martiel.

Dut il dopo di misdì la int dal borc si jere fermade par chê disgracie sot i nûi che al pareve puartassin burlaç e tampieste e che dome sot sere, l’aiar, ju veve fats svolâ in altris lûcs.

Intant si jere fat scûr e inte androne e su le strade si contave dome di Rino, de sô vite, di Franca che lu varès sposât a pene finide la stagjon. Dut il mont si jere fermât. Sôl cualchi gnotul che al pareve al les a sbati tai scûrs dai barcons no la finive cui soi svoi. Lis feminis no vevin preparade nancje la cene, tant, par i fruts, une scudiele di lat frêt e bastave e par chei oms un fregul di lidric e, se al jere, un ûf dûr al jere plui che vonde. Pensavin nome che no si podeve no lâ a la vegle a cjase di Mafalde.

• 

  Anonimo has written: 16 di Novembar dal 2013 at 12:30 DM Rispuint

  Cuant il dolor e la gjonde faseve comugne tra la int e vignive scudielat dal cur l un l altri, che volte sì si usave sanc di fradis.
  Biele, cu la fuarce di tocja il di dentri.
  Lusian di Varian.
• 

  Anonimo has written: 16 di Novembar dal 2013 at 5:59 DM Rispuint

  "Biele, cu la fuarce di tocja il di dentri" par cheste reson o sperares tant che la conte e vês un seguit.
  Graciis