Biele. Une flabe. Une sperance...
La Madone des Graciis
Saveri Sengar al polsave su la poltrone te sô buteghe di anticuari, ancje se al saveve che al varès podût indurmidisi di bot par sveâsi intun altri timp. Cuant che al rivà, Arcjan Rinalt al tacà a dî che daûr dai siei studis al jere strani che il lûctignint Emo al ves consegnât tal 1479 un cuadri de Madone, regâl personâl dal sultan di Costantinopul, ai fraris de glesie dai Sants Gervâs e Protâs, deventade Madone des Graciis. A larin a bevi un cafè e ‘po Saveri al tacà a lei dut ce che al podeve su cierts librons e, tant par no gambiâ usancis, dopo di un pôc si indurmidì.
Si sveà tal salon di un cjscjel, dongje di un barcon. Al cjalà di fûr: si viodeve une glesie in piere, plui alte rispiet dal troi che al rimontave e plui in jù, come cjalant di une culine, un boscut cuntun sfuei, une altre glesie e daûr un piçul borc. “Praclûs” i rivocà une intuizion, viodint lontan lis monts dal Natison. Ma nol ricognosseve nuie altri: se al jere sul cjscjel di Udin, dulà jerial il puarti che al mene adalt? Al rivave a pene a viodi arbui che a ocupavin la rive. Al sintì des vôs, alore si gjavà svelt la gjachete e la platà sot de bancje, si tirà sù i bregons fin sot dal zenoli e si slargjà la cjamese in vite.
Cuant che il grop di int i rivà dongje al jere pront. “E chi ch’el xe st’altro?” al disè chel plui autorevul. Saveri s’impensà di vê viodût un cuadri dal Bellini che al mostrave l’omp denant di lui. Nol veve intor il vistît damascât colôr d’aur, ma la muse e jere chê dal lûctignint Giovanni Emo e al capì ancje in ce timp che si jere sveât: nol podeve jessi che tal 1479. “E cossa voleu?” i domandà l’omp. “Ecelence, o soi de Fraternitas Sancti Gervasii. Us dîs che la int e pree, soredut dopo che la vuestre Madone e à fat vuarî la coghe che si jere taiade une man…” al imbastî Saveri. “E alora?” “Alore, ecelence, i fraris a pensin ch’e sarès une robe grandonone se vô o volessis, cu la glorie ch’e covente, dedicâ il cuadri a la nestre puare glesie.” E daûr al zontà svelt: “Cun relative traslazion.” “Traslazion?!” “Sì, ecelence, cussì di sistemâ la inmagjin miracolose tal puest ch’e merite a vuestri merit.” E Saveri al pleâ il cjâf, mostrant di vê finît. “Mmh… No xe mal come idea…” al rispuindè l’Emo, cjalant il so compagnatori. “Ghe penserò sora” e lu molà culì. Saveri al tirà un suspîr, si tornà a sentâ su la bancje e dopo di un pôc s’indurmidî.
Cuant che al tornà a sveâsi in buteghe, Arcjan al jere denant di lui. “Dulà sêso stât?” “A sistemâ une robe. Savêso, Arcjan? Il Zardin Grant nol jere mâl une volte, cul bosc e il sfuei plen di aghe.”
#267
1 comment
Lasse une rispueste
Dutis lis contis
Propit te glesie di "Madone des Graçiis" a si son maridâts il nono Zuan Marie e la none Miute, che e varessin vût tre fruts; il prim un masçjo, po une frute che sares deventâde me mâri.
Me mâri Gjeme e gno pâri Arduino a si son maridâts ançje lôr a "Madone des Graciis" a Udin, e come secont fî, dal 1950, o soi nassût jo.
O soi cressût sot de protezion de "Madone des Graciis"; tantis voltis o soi stât in pericul di pierdi la vite, ma la Madone e tignîve la sô man sul me cjâf! Mandi a dûcj Maurizio Di Fant Madrîs di Feâgne