La conte misteriose (4): La fotografie

Al jere un baûl vieronon te cjamare de mame. Al jere il baûl plui vieri che o ves mai viodût, un di chei cul tapon staronzât, tant che la panze di un tripon. Ficjade dentri ta chest baûl, sot de blancjarie puartade a marît che no si doprave mai apont parcè che e faseve part de dote; sot de arzentarie che no si doprave mai parcè che e jere un regâl di gnocis; e sot di ogni sorte di curdelis coloradis, botons, certificâts di nassite; sot di dut chest e jere une scjatule cu lis fotografiis di famee. La mame no i permeteve a di nissun di vierzi il baûl, e e tignive platade la clâf. Ma une dì jo le ai cjatade. Le ai cjatade platade sot dal netepîts.
In chel an, tai daspomisdîs di vierte, o tornavi cjase di scuele e o cjatavi la mame che e faseve lis voris in cusine. E lavorave cussì tant che e veve i braçs moi, blancs tant che arzile secjade, i cjavei secs e fins incolâts sul cjâf e i voi sgjavâts, grancj e lancurôs.
La fotografie!, o pensavi. Oh, chê fotografie tal baûl!
Cuant che mê mari no cjalave, le mocavi in cjamare, o sieravi a clâf e o vierzevi il baûl. A jerin une vore di fotografiis là dentri, e mi plasevin dutis, ma a ’nd jere dome une che i miei dêts a bramavin di strenzi e i miei voi no viodevin la ore di amirâ ogni volte che o viodevi la mame cuinçade in chê maniere. Chê fotografie je vevin scatade une setemane prime di sposâ gno pari.
Ce fotografie!
Si le viodeve jê sentade sul braçûl di une poltrone, e e veve intor un vistît blanc che i rivave jù fin tai pîts. Lis maniis a jerin a sbuf, vaporosis, une vore elegantis. Il golâr al jere a pene marcât; tal cuel e veve un cameu picjât intune cjadenute di aur. Il cjapiel al jere il plui grant che o ves mai viodût in vite mê. I coronave lis spalis tant che un ombrenin blanc, cul ôr a pene un pêl sbassât jù, e i taponave ducj i cjavei, fale che un çuf scûr che al saltave fûr di daûr. In ogni câs si viodevin i voi verts e fonts, cussì grancj che nancje chel cjapiel nol podeve scuindiju.
O fissavi chê fotografie strane, bussantle e vaìnt parsore, content che une volte e fos stade vere. E mi visi di un daspomisdì che me soi puartade daûr fin su la rive dal gno roiuç, le ai poiade suntune piere e o ai preât denant. La mame, però, e jere in cusine, cjapade dentri di citis e pignatis: une cualsisei femine, no plui la femine di adorâ di chê fotografie.

• 

  Dame mit Fächer has written: 8 di Dicembar dal 2010 at 8:20 PDM Rispuint

  La foto di mia madre
  John Fante
  Rapimento in famiglia, in Dago Red

  Dago Red, come a disi il vin ros dai imigrâts di origjine taliane, parcè Dago al jere un dai tancj mûts che, cun un ciert dispreç, si podevin clamâ i talians d'Americhe.
• 

  Il garzon has written: 8 di Dicembar dal 2010 at 1:57 DM Rispuint

  "Peste e corna, Tex, questa donna è un vero demonio!"
  "Kit, vecchio satanasso, lascia perdere le donne e pensa a tenere il ronzino che hai sotto la sella!"

  (O citi a memorie: forsit n. 5 "Satania!")

  Fortune che il contrat cu la Ostarie nol cjape dentri il timp par induvinâ la conte, se no o sarès zaromai suntune strade 😉
• 

  Dame mit Fächer has written: 9 di Dicembar dal 2010 at 9:35 PDM Rispuint

  Cavalarice che no si cjate une compagne, eroine intrepide, pistole infalibile e cuissà ce altri: Calamity Jane, stes non secolâr di Done Bete e stes an di nassite, il '52.