Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Se il mont si strucje
Zuan e Nicolò a jerin restâts in cjase di bessôi cu lis feminis. Nancje che a fossin inmò frutins di tete. Toni e Bastian, i fradis plui grancj, za di cualchi zornade a jerin jù a Udin cu lis Cernidis. Laurinç, lôr pari, al jere lât jù in citât a matine, cuntun trop di oms dal borc. La gnove si veve sparniçade bot e sclop e di ducj i paîs dongje a jerin rivadis jù sdrumis di oms in armis.
«Cheste e je la volte buine che ur es fasìn paiâ dutis!» al veve rugnât lôr pari tal lâ fûr di cjase. E lôr doi? No vevino ancje lôr la lôr part di fâ? «O sês inmò masse piçui par chestis robis» ur veve tonât Laurinç intant che al provave il fîl de sô manarie. Ur veve dât une cjalade che no permeteve replichis e Zuan e Nicolò a vevin capît che a varessin fat miôr a stâ cuiets.
Al someave che la zornade no finìs plui, ma, a pene che si veve fat scûr, si vevin sfrusignade la muse ben e no mâl cul cjalin e si vevin metudis sù dôs piels di cjavre, chê nere e chê rossite, inmò cui cuars intor. Cence abadâ al cridâ di lôr mari si vevin butâts fûr di cjase e po, saltade la muraie dal borc, a vevin corût sù pe rive. A vevin taiât pal çuc di Sant Martin e a jerin jentrâts inte cente dal Gruagn che, dal alt des culinis, e voglonave su la citât.
Bande Udin, la spaltade dal borc e jere plene di int, cualchidun vistût di mascare, cualchidun za biel che pontât. A vevin vût di sburtâ no pôc par vuadagnâ un blec di visuâl.
La citât e jere dute un losôr.
La isule dai Torians e jere in flamis. Il fûc al fiscave i palaçs ancje in Puscuel e in Graçan. Un Carnavâl cussì no si lu veve mai viodût. Al jere un spetacul di no crodi e la int e cjalave lis flamis come incantesemade. Pôc plui tart a vevin tacât a brusâ ancje i palaçs dai Gorcs e chei in Bordolee.
Juste in chel un trop di feminis al veve tacât a cjantâ: «O sù, sù, che il mont si strucje; cualchidun lu dreçarà; la justizie e je fate a gucje; no si pues plui sopuartâ!» Zuan e Nicolò si vevin cjalâts cui voi lustris. Trop no varessino dât par jessi ancje lôr jù a Udin a savoltâ il mont ta chê Joibe Grasse dal 1511?
di Carli Pup
#109
#109
3 comments
Lasse une rispueste
Dutis lis contis
Le conte a é di sigûr ben tirade e stirade come che a Carli i plâs di plasênus. Sul sogjet no fâs coments par vie chi ten par manie simpri cul plui debul o par vie chi soi un bastian contrari nassût ma mai avonde passût. Par me chest carnevâl no é une robe da gjubilâ ma da dismenteâ.Cuissà se chei di Tottenham che an picjât il fûc al lôr cuartîr juste un an indaûr a cognossevin chiste storie furlane?
O sugjerìs di lei cheste conte adun cun "Gnot di Carnavâl": il teme frontât al è chel stes, ma viodût di dôs prospetivis dal dut diferentis e cui voi di cui che par vie de etât (chi di doi fruts, là di une fantate) nol à la percezion plene e/o "politiche" di ce che al è daûr a sucedi dulintor. Si trate però, e al è simpri ben ricuardâlu, dome di pineladis che a provin a dâ une piçule cerce de clime che si viveve, ma no puedin rindi la complessitît di un event tant che chel de Joibe Grasse.
Di là de conte, o volarès però disi al amì Jajo che se il Friûl al è inte condizion identitarie disastrade di vuê al è propit parcè che cualchidun al à pensât ben di gjavâ vie de storie e de memorie un biel pôcs di episodis tant che chel de Joibe Grasse, no si trate di lâ a balâ in place (ancje se al somee che i contadins furlans lu vedin fat par un biel pieç) ma di ricuardâ dute la nestre storie par ricuardâ fint insom cui che o sin…
Sul tignî simpri pai plui debui, ducj a son libars di pensâ ce che ur plâs di plui, ma no crôt che une setemane di riviel e basti par trasformâ i nobii in puaris vitimis. Lis cronachis (par altris di divignince nobiliâr e ben atentis a marcâ i aspiets plui sanganôs di chê vicende) a son avonde claris: une disine di nobii muarts, un biel trop di cjistiei e palaçs brusâts, un pocjis di pachis e di umiliazions dadis ai cjistielans e ai lôr fameis, une o dôs violencis su lis feminis (e chest secont me al è l'aspiet plui odeôs). Isal pardabon cualchidun che al pense che te contabilitât macabre de violence chest al puedi jessi ancje dome paragonât aes violencis patidis des comunitâts rurâls e de contadinance par secui? La societât furlane e je jessude dal feudalesim (gjavadade cualchi piçule parentesi di savoltament sociâl) sì e no tai agns '50 dal secul stât: o pues capî che i pronevôts dai nobii copâts tal 1511 a cirin di fâju passâ par vitimis inocentis, ma la belance de storie e clope di une altre bande.
O domandi scuse se o soi lât fûr de suaze leterarie di Contecurte, ma lis stiçadis di Jajo a jerin masse golosis par lassâlis colâ. 😉
Carli
Ce biele tirade, veramentri, compliments! No mi displâs di vèti stiçât un tininin par animâ il blog.
Le mê idee a é chê di disi che le nestre storie o le vin inmò da fâ parcé che fin cumò o vin pôc di gjubilâ.No soi il pronevôt di nissun e a part cualchi poete no ai nissun altri von in viste:-)