Ongulis neris di morcje e un sotfont di odôr di vueli e di benzine che nol leve mai vie. Cuasi nuie di lui nol jentrave tal concet di “desiderabil”: un pôc cracagnot, voi spirtaçâts e dôs mostacjutis furbitis che i fasevin la muse di un mardar. E po, stant che i cjavei si srarivin sui timplis, al cirive di ingjanâ il voli cuntun çuf rasclen jù pal cerneli. Però lis feminis i tetavin daûr… Eh sì, Relio al veve il so as platât, la cjarte juste di zuiâ: une motociclete di no si sa tropis mans, ma biele e sflandorose, che e clamave dongje lis fantaçutis a cjaps. A comprâle gnove i varessin coventâts almancul 400 mil francs, ma lui le veve cumbinade ben: il paron de oficine li che al lavorave je veve procurade, incidentade e curumbulade, ma e veve fatis lis garis e lis veve vinçudis, duncje e mertave une seconde pussibilitât. Cussì Relio le veve comedade un pôc ae volte, e al veve saldât il coni un tant par setemane, lassant tes mans dal paron une part de sô paie. Ma ce sodisfazion: nissun veve une moto dal gjenar, vadì nancje a Udin. E jere une Guzzi Falcone dal ‘54: 500 cc, motôr a cuatri timps monocilindric, rosse e nere tant che il diaul. A savêle stuzigâ, e rivave fintremai a 130 km oraris: cualchi viaç, de rive jù, cul aiar in favôr e sbassantsi a vuâl dal serbatori, ancje a 135.
Il svol dal Falcone
A Relio no i plaseve spietâ lis fantatis cu lis mans in man, al pontave al efiet: al veve miôr di fâsi cjatâ simpri impegnât, cuntune ande a pene distrate, un spagnolet in man o il peçotut par freâ la acuile dorade dal serbatori. Ma spietâ Marine al jere dut un altri pâr di maniis: al sintive il cûr a saltâi il colp tal pet come un motôr pront a gripâ. Si sarès sintade cuntune ande di gjate bagnade, cu lis gjambis dutis dôs di chê bande, si sarès strente intor di lui cul pet cuintri de schene, e al jere sigûr che l’arome rizinât che al vignive de marmite al sarès stât plui dolç, misturât cul profum dai siei cjavei. Cussì, le veve cjalade rivâ cul so pas sigûr e sensuâl. La maie ben tirade e mostrave lis liniis di un rezipet a ponte che al armave un sen prospar, che dome il pinsîr i scjaldave za i lenzits.
Se e ves ridût di gust – al saveve – al sarès stât bon segn: lis feminis a fasin cussì, cuant che a vuelin dâti strade libare. Jê po, che a disevin che e fos ancje lizere, e varès ridût dal sigûr a plene bocje. Di li al cine di Vençon, ogni bariglarie e podeve sei chê buine.
Cussì, cuasi cuasi che al jere lât fûr di strade, cuant che le veve viodude a spreçâsi di ridi, cjalant daûr pal spieli. E intant che al pensave “O sin a bon”, Marine i cjalave la pinie a svoletâ ca e là come un falcon, e çuf e çaf che no si scjafoiàs di ridi.
di L’Antescûr
#48
