Un puest cuiet

Al è un puest cuiet, lontan de confusion, che i si rive intun lamp, al è un lûc là che Diu al po cjacarâ cun dute calme a cui che al va a cirîlu, a cui che al à fastidiis tal cjâf. Jo i voi ogni tant e ancje se nol è nuie si sint che il spirt dal ben stâ al sofle fuart.

Vuê la mê cussience e jere sot sore e no podevi fâ nuie di miôr che lâ in chel puest cuiet, platât di doi lens grancj che cu lis fueis a sunin par lassâti il padin di gjoldi.

Prin di lâ a scuele, cu la cartele su lis spalis o rivi di corse e mi sinti a scoltâ la musiche dal svint che al sofle planc. Mi volti, e nuie. Epûr mi pareve di vê sintude une vôs, un sunsûr, un murmuiâ. Ce che o sai al è che se no lu dîs cumò no lu fasarai plui.

Samearà stramp ma mi sint di spiâ il me segret, a nissun, al aiar, a la grande orele che scolte e che rispuint, lu sai, o soi sigûr.

O tachi: O ai un segret, grande anime, se tu mi scoltis, o varès chê di confidâmi, che no rivi a tirâ fûr. Un timp, di frut, o zuiavi intun piçul zardin, su di une culinute, o vevi vonde coragjo a lâi di bessôl e mi cjatavi là fasint fente di podê stâi par simpri, ma cuant che al vignive scûr o tornavi cjase di corse come se nuie fos stât.

Par cuant che al tornarà chel incjant, se o mi cjati strac, studât, se il miôr al è za vignût e jo no ai savût tignîlu dentri di me, par une volte sole. E alore viôt di tignî cont chel incjant che o vevi di te che o vevi di vê dongje di me. Cence claps tes scarpis, ni polvar tal cûr e cence che lis peraulis a fossin vonde.

Une vôs, clare e fuarte, e salte fûr dal len e mi si involuce intor.

«Frute, tu sês fuarte parcè che tu cjatis la fuarce dentri di te, tu cjalis lontan parcè no tu ti contentis di ce che tu pestis cui pîts, tu puedis fâti judâ parcè che bessole tu fasaressis grande fadie.»

Po di chest puest cuiet jo o ven vie pront, preparât cu la muse sclagne e molade di ogni dolôr pe gnove zornade di frontâ. Nome cussì o cjati la fuarce pe zornade. Mê mari che vai, me pari al berle, une sûr che cjol nome pastiliis e no si jeve tal jet, jo in chê cjase no vuei tornâ, mi coste masse durmî in chel liet che o fissi par aiar dute la gnot. E po a scuele mi indurmidìs benon, e la mestre mi domande ce che o ai, e jo nuie, o stoi ben, miôr ca che no a cjase. Mi à dit che mandarà a clamâ i mei. Che a son a stâ un par bande e chel om che o ai par cjase no lu sopuarti e chê che e sta cun me pari no le cognòs nancje.

Il zovin che al jere poiât daur dal len, di lassù, cul aiar che i dispetene i cjavei luncs, al cjale la frute che cjantuçant si invie ju pe culine. Al pense cjareçantle di lontan: «Torne a cjatâmi frute, jo ti spietarai.»