CorseCurteNovembar#14 – Radio Prypiat

#14 – Radio Prypiat

Prypiat, ai 26 di Avrîl dal 1986.
01:23’58” ore dai Urâi, scûr patoc.

Eros Ramazzotti mi è simpri plasût tant, cun chê sensibilitât, cun chê vosute ciulante. Ma viôt tu se ta un moment cussì e veve di vignîmi sù propit la sô ultime cjançon. 
“E ci seiii, adesso tuuu, a dare un senso ai giorni miei…”

La musiche di Eros e je la uniche robe che nus lee a chei sfondrâts, cragnôs e impestâts di rus, ma nô, dal Front pe liberazion de Ucraine, usgnot o fasarìn tonâ chê putane di centrâl nucleâr, sacrificant lis nestris vitis tal atac.

I miei compagns di bataie a àn a pene viert il varc come previodût e jo, sul gno sidecar Ural model M67, cul biroç in bande sfodrât cun 100 chilos di cjandelots di dinamite o soi partît par butâmi come un proietil te panze di chê bestie radioative. 

E je gnot ma al criche za il dì e tal sflandôr fosforessent di une aurore di rais al plutoni²³⁹ che a sclarissin la scuretât, o sint lis mans che si dislidin e si misturin cu la gome des manecis dal motorin. Il siroc bulint che al sborfe fûr dal cûr dal reatôr mi dispetene, fasintmi pierdi i cjavei a çufs.
“E ci seiii, adesso tuuu…”

100 metris e i voi mi gotin sanc cussì tant che ju strici par podê viodi il troi ta cheste Istât nucleâr. 
“…al centro dei pensieri mieiii…”

L’ultin militâr restât mi svintule intor une sglavinade di colps, ju sint jentrâ te cjar laide cence provâ dolôr. Un colp mi disledrose gramule e lenghe, fasintmi spudâ fûr dute la bave che o vevi in bocje.
“…la parte interna dei respiri tu saraiii…”

O moli lis mans dal manuvri e mi lassi niçulâ di chestis bugadis atomichis che, tant che i dolçs aiars che a vegnin sù dal Mâr Neri, a san di sâl e a brustulissin chest corbam fracassât e sfantât…

La canotiere si è incolade te piel ruane, no viôt plui nuie e tal ultin o pensi a mê mari, ae mê femine, ae mê nazion. Dome une grant soreli blanc. Come la albe che e lamparà doman tal cîl de Ucraine cuant che dut il mont al savarà la veretât sul atentât di Chernobyl…
“…che ci seiii, adesso tuuu.”

di ***
#1***

1 comment