CorseCurteSetembar#21 – Un don malandret

#21 – Un don malandret

La lûs ruane des boris de farie mi inlumine biel che o met il fol in vore. Par ogni sofletade, une lusorade signestre si pant tal ambient de farie e te mê muse barbude, prime di sfantâsi tal scûr de gnot.
O sint un riduç trist, pervers, a dissegnâsi te mê muse biel che o met i tocs di ram e stagn a fondi tal curizûl. Ta chê lûs e ta chel calôr infiernâl mi sint tant che il Diaul il persone.
E alore, cussì come il Diaul, ancje jo o tachi a blestemâ e a murmuiâ bramazions.
O coli il bronç fondût intal stamp che o vevi prontât. Scuen spietât un pôc, ma o ai masse premure di viodi il risultât dal gno lavôr sacrilic. La mê creature infame.
E alore, cun mans malcuietis, o disfi la suaze di len che e tignive dentri il stamp, e fûr dal savalon fumant o assist ae nassite ossene di un imprest gnûf, un imprest che nissun si veve mai pensât prin.
“Un imprest fat a pueste par copâ i umigns” o pensi, cjalant i riflès ravoscj dal fûc ta chê lame di bronç che za e somee colorade di sanc.
Cualchidun, tal futûr, dal sigûr si domandarà: “quis fuit horrendos…?”
Jo o foi! Jo, Tubal-cain! Nevôt di Caìn, primarûl dai faris, inventôr e sassin!
Cheste e je la mê creature selerade, la mê invenzion tremende: la prime des spadis, imprest maledet profanatôr de Creazion! Ve ca il gno don a la umanitât!

di Enrico Tomasi (Barba Pisul Stentadizza)
#1379

1 comment