Speciâl

O ai simpri savût di jessi speciâl.

O varai vût sì e no sîs agns cuant che o ‘nd ai vude la conferme plui clare. I voi di chel om cence etât che mi passavin fûr par fûr. La sô man grispose sul gno cjâf. A disevin che al savès lei il cûr dai oms. No ai podût sintî la sô sentence, ma mi à bastât viodi la ombre su la muse di gno pari e mê mari che e vaìve come une scoreade. Mi sarès plasût ancje a mi lei tal cûr dai oms. Ma, pal om cence etât, nol jere chel il gno destin.

Par agns o ai cirût di scjafoiâ la mê nature, ma o savevi che prime o dopo e sarès saltade fûr. Ce che mi à maraveât e je stade la semplicitât dal at. Al è stât cussì facil. Fintremai banâl. No jere nissune reson speciâl. O vevi dome voie di fâlu. E vonde. La uniche emozion le ai vude tal cjalâ a distudâsi la lûs dai siei voi. Supâle sù, come se e fos nudriment. O ai provât a lei il so cûr, ma nancje cjapâlu in man mi à judât a fâlu. Forsit, o ai pensât, nol è il gno destin.

Copâ. La prime volte no si dismentee mai. Come cuant che si fâs l’amôr. Dificil che e vegni ben. Che e vegni come che si le à sumiade. La esperience e ven dome cul fâ. E jo, di in chê volte, lu ai fat cussì tantis voltis che o riscji di pierdint il cont. O cîr di provâ simpri alc di gnûf. Personis, lûcs, mûts, timps: mai nuie di compagn. Nancje la lûs che ur scjampe dai voi, nancje chê no je mai compagne. E pûr e reste la uniche robe che un tic mi emozione. Ogni tant o provi a cjapâur il cûr, ma no ai inmò imparât a leilu. E à di jessi vere che nol è il gno destin.