CorseCurte#14 – Eline

#14 – Eline

No sai trops agns che e à Eline. Le ai cognossude dome pôcs mês indaûr e no i ai mai domandât l’etât. Fat al stâ che jo e jê o vin strent une biele amicizie, fate plui di silenzis che di peraulis, plui di pausis che di azions, plui di contemplazion di ce che o vin ator che di moviment. Mi plâs stâ cun Eline parcé che dutis lis sôs cjaladis mi contin alc: alc di jê e tant di me.
Ma Eline nissun le cjale cemût che le cjali jo. Ducj a stuarzin il nâs cuant che i passin dongje, par vie dai segns che la vite i à lassât intor.
Tes sôs mans ruspiis a viodin i agns dal abandon, jo o viôt la mari che e ten chel fi che e à podût gjoldi par cussì pôc timp; te sô bocje grande e piturade oms e feminis a viodin i agns de prostituzion, jo o viôt l’amôr che e à dât e che mai al é tornât indaûr; intai siei cjavei gresps no notin altri che la mancjance di cure, jo o viôt che no à plui bisugne di mostrâ nuie a nissun.
Ma chel che dome jo o rivi a capî al é trop biele che e je Eline. La sô piel ingrispade e je une mape de sô vite, lis sôs ruiis a son trois di emozions passadis suntun teren ch’a nol à timp, forsit al é chest che a fâs di Eline une femine cence etât, une agane che e à fat la vite, une fade che e à vivût inte strade, une dee che e je vignude in tiere par sintî parsore di jê lis soferencis de umanitât, no vuei blestemâ, ma tant che Crist. I clauts di Eline a son stâts i oms che l’an doprade, chei che l’an bandonade, chei che l’an tradide.
Cumò Eline e je resuride e e à dibisugne di silenzi e di timp par gjoldi ce che i reste de vite, che a sedin trê agns o un secul, ma simpri dongje di me.

di Alessandro Valoppi (Real Cocâl)
#1296

3 comments