CorseCurteZenâr#19 – Muse a spas

#19 – Muse a spas

Jo no pues ricuardâ chê conte che o jeri daûr di lei. Nancje il gjenar. Nome che e partignive a un libri che o cjatai smenteât te stanzie. I rumôrs dal cors, in complicitât cun chei de schene che e bruntulave pal tant timp passât leint intune brute posizion intal jet, a mi deciderin a lâ jù a cjaminâ e curiosâ un pôc. O restai un ninin cjalant dal lobby fin che o cjapai anime par zontâmi inte fulugne.
O soi stât passant il timp cjaminant a planc parsore dal marcjepît e a voltis fermantmi a cjalâ plui in detai cualchi caroce o comparse.
La mê schene za dibot no mi fastidiave e o decidei di tornâ intal hotel. Cuant che o zirai sore il gno pas mi someave che tantis da lis personis da la schirie a si fermassin plui dal normâl inte mê muse intal moment che lis vogladis a si incrosavin. Prime o pensai che al jere parcè che jo no puartavi costum ni mascare, nuie altri che discretis, e ancje smamidis, gjachete e cjamese. O ai gjavât fûr a colp la idee par mone, no jeri l’unic che al jere alì come osservadôr.
Il sintî che parsore de mê muse lis vogladis a si fermavin plui dal normâl al fo in cressite. O començai a cjaminâ cjalant parsot, par isolâmi. O sintii une man inte spale. Une biele femine dai voi neris e profonts stravistide di zingare a mi riduçave cuntun tic di malizie. Si sarà inacuarzude – o pensai – che o soi restât sturnît preseant la sô bielece.
“Tu no ti ricuardis la conte parcè che la conte istès e jere une mascare, tu ti sês metût dentri ancjemò, e ducj lu savìn.”
Jê mi scaturì cuntune grande bussade (inmò a mi comôf ricuardâlu) si zirâ e e partì.
La mê memorie no je nuie buine, alore o continui a doprâ cheste mascare che ducj a crodin che e sedi la mê muse di simpri, nome jo o sai che la vere e je restade zirant intun cors da conte o forsit e je za metude vie intune scjatule fin al prossim carnevâl.
Tornaraio a cjatâ la biele zingare?

di Zorz Cesaratto (Vecjo Claes)
#1169

1 comment