CorseCurteZenâr#06 – Il baûl des mascaris

#06 – Il baûl des mascaris

Ducj si mascarìn, volint fâ biele figure in chest mont che nus à tocjât di vivi. Par chest motîf o vin bisugne des mascaris come dal aiar che o respirìn.

Gjisulf al viveve te cjase di famee dulà che secui indaûr e jere scomençade la sô gjernazie e ancje la storie dal baûl des mascaris. Lui a so timp lu veve eredât, e cuant che al rivarà il moment, jal lassarà a un zovin de cjasade.

Gjisulf ogni buinore si meteve la mascare juste. Sal jere par lavôr e jere serie e afidabil. Tes riunions tra amîs al veve une che e mostrave une grande bocje di ridi, simpri atente cuant che i fevelavin, cjalantju di continui dret in muse. Se al visitave i gjenitôrs, indi veve une di fi premurôs e impegnât, ju scoltave simpri cun rivuart cence mai scomponisi se si ripetevin. Se al leve a visitâ i siei fîs al veve la miôr muse di protetôr e benvolent e cui siei nevôts, al veve une di nono figoton. E cussì vie vie, cun dutis lis situazions che si presentavin.

Cuant che tor sere al tornave a cjase, si gjavave la mascare e al tornave a sei lui stes, normâl si podarès dî, come la gran part de umanitât.

Gjisulf al saveve che tal baûl no dutis lis mascaris a jerin buinis, come chês che al vignive metintsi fin modant. Chês altris, dome a cjalâlis i fasevin vignî volt di stomi. Di piçul al jere rivât a savê, par vê oreglât di scuindon daûr des puartis, che cualchidun dai antenâts de sô cjasade lis vevin dopradis chês mascaris, cun chê libertât che ur concedeve il podê, ma che le vevin vude grivie cun la justizie, pe finalitât pôc clare di chestis azions.

O jerin in plen carnevâl. Gjisulf, sgarfant tal baûl al cjatà la mascare di Arlechin, i sovignirin ricuarts di tancj bacanâi de sô zoventût e un sgrisul di morbin i corè dilunc la schene. Chê sere stesse al decidè di lâ a cirî la sô Colombine, le cjatà tal mieç de fieste cenglade di ridadis smorfeosis e soradinis.

A scomençarin a voltizâ come trotui, fintremai che si forin pierdint tai meandris dai ricuarts.

di Galliano di Buenos Aires (Sicheduncje)
#1156

2 comments