In chê volte il furlan al ere ancjmò doprât avonde e si podeve doprâ la lenghe ancje par la musiche,…
CC26Otubar#18 – Un mûs maridât

#18 – Un mus maridât
Al jere rivât a cjase cuntune ostie di sculture.
“Il mus”, di Pecile, riproduzion in scjale vatalcîr. Se al fos stât, almancul, chel vêr, lu podeve tornâ a vendi par tirâ sù cuatri francs. Invezit, in cjase e veve dome un mus vêr ma nol valeve nuie. Passade la puarte, al veve za tacât cu la solite naine: “Al è di Pecile, scultôr furlan, emigrant…” e vie indenant, cuntune schirie di boiadis pseudo-progressistis da inteletuâl che nol veve mai alçât il cûl de cjadree. Tant jê aromai e saveve ben che nol jere ni cussì progressist ni i freave une ostie dal Friûl, dai emigrants o di alc diferent de sô bighe, ma che al mudave ideis su la fonde dai amîs dal moment.
Al leve indenant a dî monadis, no i interessave nancje viodi se jê lu scoltave o mancul, tant l’impuartant al jere pontificâ e puartâ indenant la senade. Cualchi volte si jere domandade se ancje cu la sô amante al pierdeve tant timp a sbarâ cagadis, ma al jere cussì plen di sè che figurìnsi se al molave un pussibil public. Puar biât, parcè no aial voie di divorziâ e vonde? Parcè che se no no lu tache plui nancje jê, viodût che la uniche robe interessante dal so caratar e je che al è stât bon di maridâsi.
Al tabaiave, e tabaiave, e tabaiave… Alc gjavât fûr de AI su la forme de sculture, sui materiâi, su Buenos Aires, su la muse de bestie. “Viodistu i dincj e la code alçade? Al è un mot di riviel, nol è cussì content di jessi sotan e al fâs viodi di jessi cuintri dal paron.”
Jê e spice lis orelis. Il paron. Come lui, brut basoâl, che i tirave sganafons e i lassave simpri dut il lavôr.
I va dongje par passâ i dêts su la sculture e sintî il pês, e i dîs: “Ce biele. Ma ise di piere?”
“Sigûr!”
Al è un moment. I tire une biele sdrondenade tal cjâf cun chê ostie di mus. Toc. Dome un sunôr sec e al finìs par tiere, batint la muse di pês. Ce frait, nancje di murî cun dignitât al è bon, il pucefadie.
Cumò dulà vevial di platâlu? Tal ledanâr o tal most? A ogni mût, ancjemò une volte e veve di lavorâ e fâ jê ducj i sfuarçs.
Materie: Art
di …
#1951
This site uses Akismet to reduce spam. Learn how your comment data is processed.
Scrivinus a contecurte[at]gmail.com
Jentre te Liste di Contecurte
Ultins coments
In chê volte il furlan al ere ancjmò doprât avonde e si podeve doprâ la lenghe ancje par la musiche,…
In chê volte il furlan al ere ancjmò doprât avonde e si podeve doprâ la lenghe ancje par la musiche,…
A son passâts pe Ostarie
Adelmo Della Bianca Alessandro Valoppi Alessia Meacci Alessio Ecoretti Angelo Floramo Barbara Battel Bepi Zefon Carli Pup Cecilia Liva Checo Tam Christian Romanini cjadenedicontecurte Covidcurte Day Cristina degli Uomini Davide Peressoni Di Suald DoneBete Dree Venier Eduart Baschera Egle Taverna El Fari Eline Enrico Tomasi Eowin Fantacorsecurte Ferdinando Passone Francesca Giorgetti Franco Marchetta Franco Vigo Frank Spada Fuguline Fulvio Romanin Gaetan Cogôi Galliano di Buenos Aires Gianfranco Pellegrini Gianluca Franco Giuliana Pellegrini Guido Covàs Isa Dorigo Ivano Urli Jacum Tiburzi Jacum Trevisan Jaio Furlanâr Javier Moscufo L'Antescûr Laura Dri Laurin Zuan Nardin Lenart Gjavedon Leonore Lorele la Morete Luche Bagnarol Luciano Marinig Lupo Manarie Maghe Olstrele Marcello Marangone Marcelo Del Mestre Margarite Cogôi Maria Veronica Moscufo Mario Facile Marisa Gregoris Mariute Massim Furlan Massimilian Glîr Maurizio Di Fant Maurizio Mattiuzza Michele Vuardianut Calligaris Michêl Londar Milio dai cjans Nello Malisano Nene Furlane Noemi Salva Norma Romotowski O. Zete Pablo Gortan Passadôr Patrizia Torossi Pauli Fantini Pauli Jacuz Pieri Moràs Pierina Gallina Plume di Ingjustri Rafaêl Serafin Renzo Brollo Renzo Turùs Ricardo Gregoretti Ricart Tiburzi Rudy Citòs Sandri Carrozzo Scoltecurte Silva Ganzitti Spirt Anonim Stefano Gasti Stefano Lombardi Stiefin Asquini Stiefin Morat Stiefin Stefanut Stralunade Tiziana Novello Tommaso Pascolo Zorz Cesaratto





Lasse une rispueste