CC24Novembar#08 – Lune pognete

#08 – Lune pognete

Sabide, vot soresere, mi sune il telefonin.
”Copari, lune pognete marinâr inpins! Prepariti che si va a sgombri.”
“E dulà? Vino di rapinâ la Coop?”
“Scemo a Puart Garibaldi jù pe Romee”.
Al e un mês che mi tormente di puartâmi in barcje te marine di Ravene a pescjâ sgombri. Jo soi di crets, no di mâr specie di cuant che a Lignan di zovin un ganf mi à cjapadis li sgjambis e o soi lât sot a plomp, e cualchi diu di là sù mi à tirade une cjavece. “Copari viôt che a metin ploie e mâr mot
“Fiditi, se il mâr al fâs onde di une rêt no ‘nd è vonde!”
Dôs borsis di pasture nauseant picjadis sui spieluts fûr dai finestrins a disgotin saradelis dilunc de strade, dîs cjanis di ogni fate e lungjece incjastradis tra i sedîi fin sul cruscot, redinis, frigo conzeladôr e un baulet di Alì Babà plen di plomps, fîl di ogni spessôr, lescjis artificiâls, ams di ogni fate e misure, suros, nô trê amîs e trê biris: machine plene, si va! Al sglavine che diu la mande. A pene fûr di un cavalcavie mi mûr la machine… L’antifurto in corto! Come l’allegro chirurgo sot la flame dai acendins o sgarfi cu lis mans te panze dal motôr par scolegâ chel fîl maledet. A Mestre un cafè coret par tignîsi sù e po jù pe Romee. Sul cricâ de prime lûs o sin cui pîts sul savalon, usmant la brume umide di sâl e slungjant i vues. Il revoc de sbrume blancje e regolâr dal mâr nus lasse tai nestris pinsîrs. Aes sîs o vin apontament pe barcje a nauli, e il pescjadôr scjassant il cjâf nus dîs: “Voâtri xe mati, je l’onda longa, se cresse tornê casa”.
La barcje je basse e stabile, ‘tor ator come ferâi, lis canis prontadis cun tant di campanei in  ponte a insiorin i siei flancs. Pasture butade e un biel soreli nus dâ il bundì. E no trê? Ce scuadre! Il copari professionist dal ganç, il venesian atent ma cul lavri gnervôs, e jo cul mâl di mâr. Lôr a pescjaran , jo tra un sboc e chel altri o prepararai lis lescjis e la pasture. Je passade une ore, cjapât nuie, dome frêt. Di colp l’ecoscandai al tache a pivetâ. Un grum neri al bulighe su chel schermi vert. Pes! Dôs balis plui grandis ator di lôr. Cumô i sin parsore. Si slame, si lance, si slame, si lance… e il celest arint dal sgombri si slargje sul breâr de barcje come a Jesù sul Tiberiate. Si bale simpri plui su chê onde che cumò nus  spude la sô sbrume su la muse e il soreli al cristalize sul cerneli. Un berli: “Copari un ton! Mi à spacât dut. Dami la cjane di mâr e tachimi su un sgombri!”
Il fîl sivilant fûr dal mulinel al svuale lontan puartant la lescje, e prime che e tocji aghe, une ombre lusinte come un missil se puarte vie. Mi passin pal cjâf Hemingway e Moby Dick. O svuedi in mâr un podin di pasture, ma un scapolo di onde mi sbelance e vie jo tra il grum dai pes. Il celest dal cîl al devente blu. Come intun fermo pause o cîr di capî. La aghe e je pesante jenfri i miei vistîts e la pôre mi inglace il cjâf. Pîts e mans però si movin in automatic e la bocje e je sigjilade pal sgoment. O sgarfeti come un cjan viers la merinde, ma o sint i polmons oremai pronts a vierzisi e jemplâsi di aghe! Soi a lis cjavecjs! No me spietavi cussì, pluitost colâ jù dal Montasi rodolant cui becs jù pai crets. E inmô une volte une cjavece! Un seglot colm di pasture peât suntune cuarde, la mê boie di salvament. Une, dôs mans mi tirin sù, strafont come un cuain. “Copari tu mi âs fat scjampâ il ton, tu vevis di metîi almancul il sâl su la code!”

di Stiefin Asquini (Siruc)
#1802

2 comments