Independence Day – 9/10/1996 (al cine)

Une grande ombre e passe parsore de Lune. Oms de Tiere a vignirin in pâs achì tal Lui 1969: archeologjie cosmiche.
Il relit de stazion spaziâl si sfracaie cuintri la parêt de citât stelâr. Ultime prove de Tiere che si distude. Il meteorite spaurôs al ralente. Ombris grandononis a platin il Soreli su lis citâts dal planet.
Nô, di front ai navigadôrs dal cosmi, o sin dome besteutis di scliçâ.
L’Apocalìs e je tacade.
Chei che a stan dongje di me no si rindin cont: a ridin come basoâi a lis piês batudis dal film, che jo o volarès gjavâ.
No si rindin cont che l’enorm disc di fûc che i pastôrs a viodin tal desert al è il stes fûc divin che al ardeve tal cîl dal Sinai, compagnant l’esodi ebraic trê milenis prime.
E il prin atac de cjace lizere aliene? Compagn dai çupets di fier cu la code di sgarpion. Un sene tremende za previodude dal profete di Patmos.
La sene dal laboratori e je cjapade dal film Alien.
“Ce vino di fâ?”
“Murî!” al rispuint l’alien, manipolant lis cuardis vocâls dal professôr in agonie.
Il Feuersturm dresdian si slargje su lis citâts americanis che a vegnin sfulminadis.
I Stealth a son partîts des poltronis daûr di me, intal cine: mi stan svolant su la cope.
Cemût sbaraiâ i mostris? H.G. Wells al fasè copâ i marzians cul virus dal rafredôr.
I aliens dal Apocalìs a vegnin batûts di un virus di computer.
I avions de Tiere a dan il colp di gracie ai pignatons svolants che si poin al suel intune grande flamade. E tache la cjace ai superstits.
Scometìno che une lôr colonie si salvarà platantsi su la Tiere par vuastâ di gnûf?
Par vê un secont cjapitul, come che al insegne Darth Fener in Star Wars cul so cjace stelâr che al va a la derive tal spazi, intat.
Din une altre ocasion ai çupets de Bibie.
Ce “trip” spasimât! O soi talmentri cjapât de storie che mi insumii dai abitants di Zepon, creaturis viventis suntun eletron, tun fumut agns ’50.
O ai pôre dal scûr. O cjapi masse sul seri chestis storiis.
O ai timôr pal avignî de Tiere!

di Checo Tam

1 comment