CC24Otubar#19 – Cjalant in cîl

#19 – Cjalant in cîl

Il timp al jere passât ancje par Lidiana, ma ducj, cuant che le viodevin, si domandavin, cemût cussì indenant cui agns e di un pieç za none, che e fos restade come une fantate. Tai siei tancj cjavei neris no tu viodevis, nancje se tu lu cirivis cul lumin, un che al sedi blanc. Il merit par chel miracul de nature di sigûr al jere di sô mari che le veve parturide, ancje se a vele mantignude cussì zovine al jere il so grant amôr par la piture. Za di piçule, cui pinei e cui tubets plens di colôr che i vevin regalât, e veve tacât a piturâ i siei prins cuadris. Bielins, ancje se in chei lavôrs si viodeve che in chê sô passion nissun le veve mai scuelade. Par chest sô mari, braurose di chê frute, a pene deventade fantacine, le veve notade ae scuele Sello, l’istitût de art di Udin, indulà che par sô fortune e veve vût come professôr Mario Baldan. Un om che nol jere dome un professôr, ma soredut un grant pitôr.
Chel om, par tant che al fos brâf come professôr, Lidiana, le veve sedusude. Soredut cuant che i veve insegnât la piture astrate. “Se tu âs di piturâ un cuadri astrat – i diseve – no tu âs di riprodusi su la tele lis robis cu lis stessis formis che si presentin denant dai tiei voi. Tu âs di imparâ a sledrosâlis, par dopo ricomponilis cun segns, colôrs che a rapresentin lis emozions che ti àn metût tal cûr.”
La art astrate, Lidiana, par dabon, le veve striade e no mancjave mai a lis mostris par amirâ i cuadris dal so professôr. Dai tancj che lui al veve piturât, i plaseve tant “Volo” un cuadri, piturât a vueli su une tele. Un cuadri astrat, che par jê al jere une maravee. I plaseve, pe bielece dai siei colôrs. Soredut par chel zâl che al veve come sfont, e par chel intric di fîi e par chel uciel.
Di in chê volte, il timp al jere lât vie di corse e chel cuadri, aromai deventât famôs, Lidiana, a jerin passâts tancj agns che no lu viodeve. E une dì, savint che al jere espost a San Martin di Codroip, te pinacoteche de Vile Kecler, cun Manlio, so nevôt, e veve cjapade sù la machine e e jere partide par tornâ a viodilu. Rivade denant di chê piture, pe sô bielece, Lidiana, si veve sintude di gnûf emozionade. Pecjât che   so nevôt cjalant chel cuadri par lui tant misteriôs, cence stâ a pensâ dôs voltis, nol veve spietât a pandi il so stupôr. “In chel cuadri, saran biei i siei colôrs, soredut chel zâl, ma chei fîi e che sorte di uciel no ju capis. None, la art astrate par me e je masse complicade.”
Puare Lidiana, sintint chel frut e veve provât sconciert. Mancul mâl che a pene tornade fûr di chel palaç, cjalant il cîl cun tancj nûi sburtâts dal aiar, i jere vignude tal cjâf une biele idee.
E fevelant bessole si ripeteve. “Sì, lu puartarai su la Mont di Varian che e je chi dongje e di là su, Manlio, di sigûr si acuarzarà che chei nûi che a corin vie non son dome tocs di glace o ploie. E se al savarà cjalaju inte lôr panze al scuvierzarà un mont maraveôs.
A pene rivât in som de mont, scoltadis lis peraulis di sô none, distirât sul prât e alçat i voi tai cîl, Manlio, si veve pierdût a cjalâ chei nûi che il tramont al veve colorât.
Intun prin moment i someave un zûc, ma nol jere passât tant timp che chel cîl come par magjie al jere deventât un luna park e chei volums di aghe o glaç plui ju cjalave, plui a cambiavin la lôr fisionomie. Jenfri chei colôrs che a chê ore a jemplavin dut il cîl i someavin tantis gjostris plenis di cjanuts e agnui che a corevin e balavin ator ator.
Denant a chel spetacul, content, si jere estasiât. Ma la plui felice e jere  sô none che e veve capît che so nevôt, cjalant chei grums di glaç o aghe, judantsi cu la fantasie ju veve savoltâts, provant lis stessis emozions che al cirive il mestri Mario cuant che chel uciel lu veve piturât.

di Nello Malisano (Gjino)
#1788

Note: cuadri di Mario Baldan

2 comments