CC24Zenâr#18 – Gjenodane Pilocapgi

#18 – Gjenodane Pilocapgi

E jere une volte, e forsit e jé ancjemò, Gjenodane Pilocapgi, une strie tant, ma tant triste.
E veve la muse vert scûr e il cerneli segnât di un grant e brut monocei. I soi dinçs a jerin di colôr zâl stomeôs e sbusâts di piçui vierûts strissants che aromai a vivevin li dentri.
Parsore dal nâs, un vierut acuilin di un vert infezion, a si tiravin sù cuindis bruscs bocognons e tra lis narilis e i lavris al cucave un pêl riçat contornât di une belece ripugnante.
Il barbuç al jere dret e cu la ponte come la mont Fuji e parsore la gobe infûr a cjaminavin a planc lis tarantulis.
Gjenodane e jere parfin canibale e e mangjave cicine umane. E veve mangjats plui di 2000 di lôr; ju meteve tes tortis che dopo e vendeve tes mensis scolastichis.
Gjenodane e jere ancje une gaugare, ma e jere propite une impedide. Cuant che e tirave i çoncs, la int no si divertive e i tirave simpri i pomodoros te muse, ma no parcè che e jere triste, ma parcè che no faseve ben il so lavôr e e puçave ancje di pes frait.
Une dì, une sûr e un fradi di non Luna e Ottimus, une frute e
un frût di 9 agns, che si volevin tant ben e a stavin simpri insiemi, a lerin a zuiâ dongje di un bosc.
A cjolerin il frisbee, lu tirarin masse fuart  e al e finì tal mieç dai arbui, dongje di une cjase a forme di cjapiel.
E jere la cjase de strie Gjenodane.
Luna e Ottimus a jentrarin tal bosc par cirî il lôr disc di plastiche; ma propit in chel le strie ju viodè e ju invidà te sô bjele cjase. Ur disè che jê e jere une grande gaugare, bravissime a lançâ i çoncui e ancje il frisbee; cussì ur proponè di fâ une partide, anzit une “challenge”, al ultin sanc.
Luna e Ottimus, cence pensâ trop parsore, a deciderin di sfidâ la strie.
E… ben po, o savês bielzà cui che al à vinçût!

di Francesca Giorgetti (Daisy)
#1525

2 comments