CC24Zenâr#13 – La mari cjatade

#13 – La mari cjatade

Mê agne Fanny un vencul?!… se tu âs di cirî la definizion tal DOF, gjavât fûr la sô condizion di femine, al someares vêr: Vencul s.m. incubo. Spirt che al cîr di scjafoiâ intant che si duar … Mierde!… i indizis a jerin ducj di face, e nô no ju vevin viodûts… tcht tcht. Il barbe Vigji lu veve dit tantis voltis!… e nissun i crodeve… Ancje a mi une dì mal veve dit: “Cjale Marcel, cjale il mio cuel, viodistu lis marcjis ca?” A someavin improntis di mans, rossis, tant che cualchidun i ves metût lis mans ator ator par scjafoiâlu!… cjalant Fanny o ai viodût un slusicament di voglade malevule e legre vignî sù te sô muse ma nuie di plui… boh, stramp ma nuie di incriminant. Ma tornant ae definizion. Prime robe: incubo, blip… Fanny e je une femine, sì che duncje la definizion no corispuint parcè che e sarès descrite tant che un sucubi, un spirt femenin, no mo?… Eh sì, pardavêr, Fanny e vevie tentât di scjafojâlu parcè che Vigji no le lassave durmî cu lis sôs ronceadis?
Fanny une scjafoiadore?… Lassin pierdi! Plui che un spirt malevul mê agne e jere une Strie, une strie blancje, si il tiermin al esist, e jere une femine che e veve un mût di fâ inmagant, incisive, direte, cence doplece, che e clame pan al pan e vin al vin ma che al stes timp, in dibisugne, ti vierzeve i braçs e no ti lassave jessi avilît a cjase sô, mai.
In realtât la sô cjase e jere un ripâr, par me. O vevi pierdût mê mari a doi agns e Fanny e jere deventade la mê prime “Seconde mari”.
Sì, i piçui a àn une mentalitât pratiche: âstu pierdût tô mari? Bon… tu ti cjatis une altre e vonde! La mê storie di vite e je stade une ande continue in ricjercje de mari pierdude e Agne Fanny e je stade dome la prime. None Rosa, la mari di Fernando, Mary Bassi, Agne Zaira, dutis plenis di amôr par me e che a àn contribuît a fâ sopuartabile la mê vite, mi an judât a deventâ madûr. Cun intops, chest al è vêr, cun infinîts lâ e tornâ: nol è di dineâ la evidence. E cun risultâts non convenzionâls: fûr di dubi!, ma che vuê me permetin di dí che… no soi un vencul.

di Marcelo Del Mestre (Ombre Grise)
#1520

1 comment