CC24Zenâr#10 – Hinko

#10 – Hinko

Al è un paîs piçul tal nord de Styrie, in Austrie, che si clame Liezen. Cumò al è cjâf lûc, ma tal 1920 al jere une piçule citât murade ator di une fabriche di bire.
Heinrich al jere cressût in chê suaze tes Alps, dongje dal flum Emms, ma di batisim i vevin dât di non “Hinko”.
Al saveve che ducj i fantats dal paîs a fasevin simpri un rituâl dongje dai dîs de epifanie, ma nol imagjinave ce che a fasevin daspò dal scûr. I disevin che al jere ancjemò un canai e che nol veve colpis di lavâ. Ma chest nol jere coret.
La famee e puartave sù une ostarie dentri dai mûrs. So pari al voleve che Hinko al studiàs, ma a lui i plaseve di plui lavorâ te cusine, ancje se al veve pôre di brusâsi o di messedâ i curtìs. So pari al veve fat prime il becjâr e al veve une sgrimie che Hinko ancjemò nol cjapâve. Cundut di chest, Hinko al jere un bon jutori.
I gjats di cjase a fasevin ancje lôr il miôr. A jerin bogns di netâ des surîs la ostarie che tune fabriche di bire cun ducj chei grans dapardut, a jerin grandononis e ben passudis. Ma ai gjats ur plasin ancje lis robis che si puedin cjatâ intune cusine.
A son un grum di robis che no puedin cumbinâsi. No mo? Butâ un curtìs a un gjat, di sigûr di no, soredut se no tu âs destrece. E jere chê la colpe di lavâ par Hinko.
Une dì te cusine si jere inacuarzût che la gjatute di sô mari e jere lade sù su la grande taule di marmul, dulà che si taiave la cjar, par cjapâ un toc di polpe di so pari. Hinko al veve butât un curtìs grandonon par spaurîle, ma il curtìs al jere lât a impirâsi jenfri dai voi de gjatute.
Hinko al veve cjatât un so coscrit par domandâi se al podeve fâ part chest an di chê robe misteriose di Epifanie, nol rivave a durmî di gnot. Chel fantat i veve contât dut su la tradizion che si tignive di secui: a vignivin sù un grup dai plui impuartants Krampus de Austrie.
I veve dit che no jerin dubis, il grup lu varès cjapât sù di sigûr par lâ ator a spaventâ chei che a jerin triscj, piçui o grancj, mucs o furlans. Bastonâ la int platât daûr une monture? I vevin dit che cumò che al saveve il segret, al scugnive fâ il Krampus o lâ vie dal paîs.
Cuissà se al è par chest, che al è vignût a Buenos Aires gno nono Enrique, il pari de mê mari?

di Eduart Baschera (Gato)
#1517

1 comment