ZARATON… la croniche dal event!

Ben po… cuant che l’Ostîr al veve finît di butâ jù il copion pe serade, dome cualchi dì prime dal event, par mandâlu a chei puarets de clape di soversîfs de Osterie cuntun timp minim par studiâlu e preparâsi, no varessin pardabon olsât a pensâ che la serade e podès saltâ fûr cussì ben.

Par fortune, vûstu parcè che la Sale Abaco e je une vore ben furnide, vûstu parcè che aromai o sin babios te capacitât dal “cumbinìn”, il spetacul nus pâr jessût une vore ben e no viodìn la ore di podê tornâ a riproponilu di cualchi altre bande. Dilunc di cheste croniche us metìn un pocjis di fotografiis, fatis dal nestri super Muini de Ostarie che aromai nus regale passe un centenâr di fotos a ogni serade.

Ma ce isal sucedût?

Al è capitât che la nestre gjatemarangule si è superade e nus à metût adun une siore senografie che di une bande e viodeve cjacarà l’Ostîr e il Berlon intal cercli dal timp (dulà che si jere intal futûr e plui precîs ai 3 di Avrîl dal 2024) e di chê altre bande si jere par television, e intal presint, ai 3 di Avrîl di chest an. E par television la Coghe, il Cramâr e la Massarie a son deventâts ogni sorte di personaç: gjornaliscj, complotiscj, invasâts, esperts di ogni cualsisei robe che us vegni tal cjâf e ancje chês che no us vignaran mai. E tal mieç a jerin lis imagjins gjestidis de nestre Sartore che e à cusît il fumut che al à vinçût il San Simon l’an passât, di Giulia Stirpe e Lorenzo Marangone e che… al contave nuiemancul che la storie di Zaraton, ancje se nissun si è inacuarzût. Insome… o jerin cuasi ducj e e je stade dal sigûr la serade cul spetacul plui struturât, complès e ben vignût che o vedin metût adun.

E dut chest par pandi la grande gnove dal gnûf libri di Rafaêl Serafin, il nestri Ostîr, che si è butât dentri de fantasience sociâl fintremai a contânus ce che al sucedarà ca di un an, cuant che il Friûl si svearà… anzit, no il Friûl, ma Friûl, che al è alc che no podês imagjinâ, e al va ator pal mont. No podìn contâus masse, stant che il libri al à ancjemò di lâ ator cu lis presentazions, ma insome… o sin devant a une storie simboliche, plene di riferiments al dì di vuê, che doprant trê personaçs, un vieli, un om, une fantacine, plui altris che si zontaran, nus conte di trop innà che o sin lâts, intal no tignî di cont il nestri planet e la nestre socialitât, sdrumade dai media tecnologjics fintremai a jessi fûr di control.

Al è un libri e une storie che nus fevele di sostenibilitât e ancje se si pues lei come une grande, grandissime aventure, al si pues cjatâ dentri ancje tant critiche sociâl e spieis emotîfs dal vivi. Us conseìn di leilu, par capî, ma achì us disin ancje altri dal spetacul, che al è stât un mismas frenetic di pôc plui di une ore che al à lassât cuasi sturnît i tancj che a jerin vignûts a viodi.

O vin sintût fevelâ in tantis lenghis, parfin chês che no van tant di mode come il rus e il furlan. O vin sintût pandi teoriis scalembris, o vin scoltât cjançons che a devin il non a un personaçs, o vin viodût imagjinis e imparât un pocje di criptozoologjie e del liendis che a son peadis. I Piçui Aiutants di Contecurte, che a son stâts i prins a lei il libri cuant che al jere stampât dome su sfueis di cjarte, nus sigurin che il spetacul al è stât super eficaç e ben al à mostrât un toc di libri e de storie, cence disvelà masse.

E dut chest tignût a batesim di chei de Kappa Vu che no dome lu àn publicât, ma lu àn publicât spindint un fregul di plui e doprant Easyreading, une font ad alta leggibilità che a jude a lei miôr ducj e che cun di plui e je perfete pe storie contade. Insome… Il libri lu podês comprâ za li di lôr ma ca di pôc ancje su la nestre osterie o fasarìn un biel lanç dal prodot come che al va fat e o cjatarês ogni gnove al riguart… E intant gjoldeisi lis fotografiis!