Biele! Jo par pensâ a la muart o scolti You want it darker di Leonard Cohen
CC24Novembar#19 – A cjampanis rotis
#19 – A cjampanis rotis
La fuee e tremave sul arbul al aiar cjalt di siroc. E trindulave zale e flape su la ponte di un lunc ramaç di morâr, di chei che a àn la fortune di sghindâ la cjonçadure disfigurante della stagjon d’Unvier.
I plaseve beâsi tal soreli e remenâsi al ajar cjalt. La zornade e jere frede, il cîl limpi e jê e cjalave chês altris fueis vongolâ al aiar ator di se.
Di bot, une svintade pôc plui viamente le distacà dal ramaç, dulà che e veve passât dute la sô vite di cuant che, zermuei, e veve tacât a fâ cucuc de ponte del ramaç nome un an prime.
Si sintì lizere e e scomençà a voltizâ acompagnade dal aiar e di cualchi amie fuee, ancje jê vibrante tal aiar. Ce sensazion di lizerece! Di libertât! Lassâ il so ramaç, il so ripâr sigûr e aventurâsi viers il discognossût. La tiere, che di chê e cognosseve in ogni minim detai.
Cuntun sgrisul si poià sul prât. Fîi di jerbe verts e zâi, muscli sot di jê. E veve un pês cumò, une consistence. Incjocade dal podê tocjâ, cjareçâ l’umit, il bagnât.
Daspò un altri reful, delicât e lizêr, le tirà sù e jê si lassà traspuartâ plui in là. Un gnûf puest. Gnovis impressions. Gnovis sensazions.
Sierade.
di Francesca Giorgetti (Daisy)
#1814
2 comments
Lasse une rispueste
Dutis lis contis
E nô come jê, stant al dî, di chel famôs poete. Lussian