Sgarfadis Furlanis: La glesiute di Cjarmazis

La glesiute di Cjarmazis di Teôr

La glesiute di Cjarmazis di Teôr e rapresente l’element pì antic dal borc di Cjarmazis e si ineste ta un puest frecuentât fin de antichitât. Di fat, no lontan (pì o mancul 800 metris bande soreli a mont), a son stâts cjatâts i rescj di une vecje vile rustiche e di une fornâs di cret di epoche romane che e faseve rivâ i siei prodots fin a Aquilee, doprant il flum Stele.
La glesie e fo fate sù ator dal XII secul (se no prin), doprant ancje materiâi romans: pieris tal cjanton dabàs a çampe te façade e, par drenti, tal mûr nord dongje dal cjanton, un roc di colone sot dal nivel dal paviment atuâl.
Il cjampanili a vele e il curnison a dincj che al cor sotet a son di riconduzi a un restaur di epoche rinassimentâl. La consacrazion a Sant Dree, protetôr dai pescjadôrs, il sô jessi logade dongje di un dai vâts dal flum Stele e lis rapresentazions pitorichis a costituissin des provis restadis fin a nûn da la destinazion de glesiute. Par four, su la façade, si cjatin lis rapresentazions di une Madone cun Frut in tron, in part taponade dal pilastri a man drete dal cjampanili e par chist di sigûr pì vecjo dal Rinassiment, e San Cristofar, protetôr dai pelegrins che a vevin par l’apont di passâ i cors di aghe. Par drenti a son stâts tirâts four lacerts di afrescs ascrivibii al XVI secul che a rapresentin: Madone cun Frut, Trinitât, San Roc e San Pieri.
Dut câs, l’element pì interessant da un pont di viste storic e je la sinopie (schiç preparatori par un afresc) didentri, dilunc dal lât a man drete, platât davour dal vessil. Ochì e je rapresentade une nâf medievâl (pì o mancul XII secul), che e risulte jessi la uniche rafigurazion esistente in dì di vuê de navigabilitât dal flum Stele.
La prisinze di propulsion sedi a vele, sedi a rems e mostre che la nâf e vignive doprade pe navigazion fluviâl, e di prionte par chê maritime. Cun di pì, confronts archeologjics a sugjerissin che si tratàs di une nâf di vuere.
Ma parzè rapresentâ intune glesie une nâf? E par di pì da vuere? L’enigme al è stât risolt da cugnussinzis storichis in nestri possès e da confermis archeologjichis. Il flum Stele al costituive une vie di comunicazion impuartante, doprade fin de antichitât, che e permeteve di jentrâ tal Mâr Mediterani intal pont pì setentrionâl di dut il bazin. Ancje l’Ordin monastic dai Cavaleirs Teutonics al sfrutà chistis potenzialitâts: al insedià un siò avampuest ta la no lontane Prissinins ator dal XII secul, e di li al partì par Jerusalem dilunc lis Crosadis. Al è une vore probabil che la sinopie di Cjiarmazis e rapresenti une di chistis nâfs.
Vuê la glesie e ven tignude di cont da la siore Lidie di Cjarmazis.

Sgarfade Furlane di
Massimilian Glîr
Archeolic de Ostarie

Altris fotografiis

2 comments