CC24November#03 – La mê farine

#03 – La mê farine

Mi capite spes di sintî, intai discors di cualchidun, e parcè no ancje tai miei confronts, chê biele detule furlane: – Nol è propit farine di fâ ostiis! In gjenar e ven riferide a une persone che e à un…caratarut che ti racomandi, ch’al à i siei difiets, plui grancj che piçui, e magari ancje une fuarte personalitât.
E alore un come me nol pues fâ di mancul di cjalâsi dentri e domandâsi: – Ma tu di ce tipo di farine sêstu?
O ai osservât che il caratar des personis al ven fûr za di piçui e che dopo si cambie e si trasforme cu la etât e cu lis esperiencis de vite. Cjacarant di me, za di frut no ai mai vût une buine opinion di me stes e mi preocupavi un grum su ce che chei altris a pensavin di me; ven a stâi che cualsisei tipo di critiche o disaprovazion o piês ancjemò di dinei mi creavin malstâ. Cun di plui no mi pareve di jessi mai a la altece de situazion, no a vonde fuart, svelt e inteligjent par risolvi i tancj problemas che mi si presentavin, parcè che mi viodevi simpri intun scjalin plui in jù di ducj chei altris. E cussì dutis lis stradis che o ai batût inte mê vite a son stadis simpri in salide.
Ma la mê fortune, e di sigûr ancje il me merit, al è stât il fat che a un ciert pont o ai savût reagjî inte maniere juste a chei ategjaments e pinsîrs simpri negatîfs che mi fasevin sintî come intune preson, scomençant a cjalâ lis robis intune maniere divierse e a preseâ di plui lis mês cualitâts.
Mi soi convint che ancje jo o jeri une persone di valôr e degne di fiduce, ancje cun difiets e che al veve fat ancje falopis inte vite, ma che al jere pur simpri une persone umane, che e al veve sì rispiet par ducj, ma prime di dut par sè stes, imparant a stimâsi di plui e rivant cul timp parfin a difindi la sô dignitât.
O ai imparât a fidâmi, a vierzimi une vore viers lis personis, a jessi me stes in dutis lis situazions, a domandâ aiût cuant che al covente, a no tignî plui dentri lis robis, e a scoltâ une vore chê vosute che si fâs sintî spes dentri di me e che no mi à mai tradît.
Al dì di vuê o pues dî di jessi deventât plui libar, seren, disponibil, in pâs cun me stes e cul mont intîr, ancje cui timps cussì dificji di cumò.
A la fin de storie e a proposit di farine, la mê no sarà cussì rafinade di fâ ostiis, ma jo cun chê che o ai a disposizion mi contenti di fâ il pan, la polente, i dolçs, i blecs di paste, la pize, e par ultin i nestris cussì bogns cjarsons, che a san tant di Friûl!

di Renzo Turùs (Chel di Cormons)
#1798

2 comments