CC24Novembar#17 – In Lambretta

#17 – In Lambretta

Bruno al è stât simpri franc tal mangiâ… brovade, muset, frico, lidric cun lis fricis; il plat al veve di jessi plen!
Al ven a stâi che Dolfo al si maride e al clame Bruno come copari. Gnosis modernis, il setting al è in te vigne di Vanni, preparade cun cjars, caratei e botis come taulis par poiâ il mangiâ che i nuviz a àn ordenât: FINGER FOOD.
Dolfo a nol sa cemût dîlu a Bruno che sigûr a nol mangje chês robis li; pitost al va a fâ sû mûr… robe che in ogni câs al veve tal sanc.
Ma Dolfo al sa cemût gjavasi fûr dai berdeis e al invide a gnosis Graziella. Bruno le cjalave da un pieç ma nol olsave a declarâsi. Cuant che Bruno al ven a savê che Graziella a sarès stade a gnosis, al lasse pierdi il FINGER FOOD e al si presente come copari di Dolfo, puntuâl e cun il vistît bon.
Si tache a mangjâ: polpettine di barbabietole, mini quiche, mini cheesecake…
Bruno al pararès jù carioladis, ma in tal mieç de int a no si pâr bon, un pôc di chel che a si clame, un pôc di sest! Bruno al ten duro ma di bot a sclop une vôs: ”Jo no rivi a mangiâ a spicigule e minigule, Bruno puartimi vie cu la tô Lambretta; nin a mangjâsi une pastesute là di Nando”
Bruno no si lasse scjampâ la ocasion: ”Ma no vûtu! Monte sù e tenti strente”
Di chê volte Bruno e Graziella a si son tignûts strents encje tai trois plui intorteâts de vite, dal 1972 al 2012, fin tant che il cûr di Bruno a la molât.
Graziella e je lade indenant di bessole ma trê setemanis indaûr, ai prins di Novembar, cunsumade da un brut mâl, a nus a saludâts.
E veju là, si saran cjatâts, tra di un nûl e lis stelis, ator cu la Lambretta.

di Laura Dri (Bultrik)
#1812

2 comments