CC24Novembar#12 – La biele vite

#12 – La biele vite

Anìn!… Larissa! Ancjemò cul cjâf a violis?… sveiti… dulà ise la femine che mi soi inamorât?
Uf!, al è che cuant che tu mi vevis dit di “fâ la biele gjambe” o pensavidi a alc diferent: tant che balâ, incjocâsi, jessi fûr cui amîs, fâ l’amôr…(sugjestive)

Tu tu sâs che o soi fûr dal ordenari: mi stufi a fâ simpri chestis robis, o ai miôr cjaminâ tal bosc, o lâ in mont cu la biciclete, o remâ tal flum tant che vuê.. fasint robis che mi puartin vie dal dran dran di ogni dì…

Sêstu strac di fâ l’amôr cun me, Alexey? (cun ironie)

Nop, tu tu sâs che no! pardabon…  chê e je une ativitât noturne, no ise vere?

Tu tu âs di jessi un inzegnîr!… par fâ l’amôr no vin bisugne di cjapâ cunvigne…

Ah ah ah… buine fonde… dai, môf il cûl, pontìn la barcje viers chê splaze di front, e je plene di savalon… e sarà biele di restâ li a mangjâ e daspò o fasarin il bagn … chest Avrîl al è vignût cun promessis di bon timp pe Istât co ven.

A proposit di Avrîl: ti visistu che il 26 al è il complean di mê mari e o dovìn lâ a festegjâlu a Kryva Hora.

Ben! Mi vevi smenteât che sabide che al ven o vevin un incuintri cun il Slivovitz de tô mari!… e il so Borscht incomparabil… e la sô version de torte Tsvetàeva… mi fâs vignî la aghegole…

Baste! vonde fâ il lechecûl Alexey che tu mi fasis tufâ di rabie! Mê mari ti ame plui di me e al è parcè che tu la lustris dut il timp: ce cusine gustose che tu fasis Andreyevna!…tu tu âs di insegnâi a tô fie come che si fâ chest plat… ogni volte che tu disis une robe cussì ti coparès!

No je colpe mê, e je e cussì buine cun me… tu tu sâs che mê mari e jere il contrari…chel al è un program che no varès mai dit di no: mangjâ tal mieç dai cjamps, inte chê “dacha” maraveose, plen di verts, rosis e pomis, cun ducj i nemâi ator ator tant che se tu fossis dentri di une arcje di Noè terestri, i unics che no mi amin a son chestis ocjis vosadoris…

Odieilis tant che tu vuelis, ma a son miôr che cjans par avertî di pericui… ma tu tu às reson: al è un cjanton inmagant, mi mancje dut il timp, o vin fât une biele sielte di lâ a stâ a Pripyat: o lin a pît te plante pai trois circondâts di verts fosforessents, scoltânt il tril dai uciei, o viodint la cjalade di une bolp curiose: no, o vin miôr chel che lâ a vivi intune citât plui grande… e al è vêr che la cjase di mê mari e je un paradîs in tiere… la sabide al è bon timp previodût, al sarà gloriôs…

Anin, parecjìn il mangjâ che o mûr di fam!

di Marcelo Del Mestre
#1807

1 comment