CC24Novembar#10 – Muse di cjan

#10 – Muse di cjan

E jere dome aghe e jo o preavi, parcè che la aghe no je ferme, la aghe e vûl. E dut al jere preiere e pôre, par me e par ducj: feminis, fruts, bogns e triscj. E ae fin le aghe e à volût e dut si è robaltât e al è doventât mâr, font, scûr.
Jo o menavi gjambis e braçs e o cirivi di respirâ. O domandavi fortune. Fin che, par un intîf, la man e à gafât alc che mi à tignût. Al jere un toc de barcje e, ingrampât, o ài podût spietâ. Cheste jo le ai clamade fortune, parcè tancj di chei che a jerin alì a varessin meretât plui di me, ma no son rivâts.
E fortune e je stade la nâf che mi à salvât, che no veve di passâ par li a chê ore, ma che e jere. Mi àn tirât sù, mi àn dât di scjaldâmi, di mangjâ e di bevi. Cun me a’nd àn salvâts ancjemò siet.
Ma la fortune e pese, parcè che la fortune e je une piere e une piere e je une colpe.
Forsit al è par chel che cuant che o ai tocjât tiere mi àn cjapât e sierât. Àn pesât la piere e stabilît la pene.
Forsit chê tiere e je un templi e par jentrâ si à di jessi nets, monts. E jo mi soi viodût e o jeri sglonf e sporc. O jeri brut. O jerin ducj bruts.
E tal spieli mi soi viodût, e o ai viodût la mê muse di cjan, il gno vîs di bestie. Pe prime volte lu viodevi, chest music che al vuache, chest tuf di carogne. E o ai pensât che nol jere just, che no podevi.
Cussì o ai sierât la mê muse di cjan intune sporte di nylon e o ai spietât che la fortune e tornàs ancjemò li di me.

di Stiefin Morat (Catine la Nere)
#1805

2 comments