CC24Novembar#07 – Sparîts te brume

#07 – Sparîts te brume

Adalt e platât jenfri monts e boscs ingredeâts, si viodeve un piçul paîs dal non origjinâl e stramp: si clamave Sante Brume.
Dal difûr al pareve un puest trancuîl, cun cjasis fatis di pieris e stradis di claps.
I abitants, cuant che si cjatavin, si saludavin simpri cun bocje di ridi, ma a vevin alc te lôr cjalade che al sugjerive une veretât mai nomenade, un segret che ju unive e che ben o mâl ducj lôr lu cognossevin. Al someave un pat suturni che ju mantignive unîts.
Tes gnots che la brume si faseve penze e l’aiar al remenave lis cimis dai arbui, il paisut al restave a scûr, ducj a sieravin puartis e barcons, come se vessin pôre che cualchidun al vignis supât de scuretât.
Di fat, te buinore dal doman, cualchidun dal borc al mancjave, a jerin simpri pluitost zovins. La int dal paîs e jere convinte che la barafuse meteorologjiche ju puartàs vie cun se.
I plui anzians a pensavin ben altri. Tes lôr cjaladis si calumave une misture di savietât e pôre, di sigûr indi savevin une plui dal diaul, par chel a murmuiavin: – lassâ la magne che e ledi pe campagne. – Lôr a savevin che chês personis che a sparivin profitant de brume, lu fasevin di proprie volontât, za che stracs di chê vite grise paisane, a volevin lâ viers il mont sperant di cjatâ gnovis oportunitâts.
Pôc a pôc Sante Brume si leve svuedant di chê zovine linfe vitâl che la nudrive, cul timp dome i anzians a varessin gjoldût di chel cjanton di paradîs.

di Galliano di Buenos Aires (Fuschi)
#1802

1 comment