CC24Novembar#05 – Par colpe di Rabie

#05 – Par colpe di Rabie

Jacop si scriveve lis robis par colpe di Rabie.
A dîle cussì, e somee une frase mal jessude. Par colpe de rabie, ti ven voie di corezi, e ancje cussì ti pâr che no vedi cetant sens.
Ma par Jacop la frase, di sens, ind’ à une vore. E ancje di rabie, sì, stant che Rabie, cu la letare grande, e jere la cjavale dai Mantoans, chei dal bearç tacât dal lôr, che a lui, i plaseve une vore lâ a cjarinâ di scuindon.
Il çocul de bestie i veve petât juste su la cee, cu la fuarce che a àn i cjavai cuant che si sustin, cundut che il non no jal vevin dât par dibant.
Svignî, sanganâ e la corse tal ospedâl a jerin stâts dutun.
«Potevi perdere l’occhio, sai!» i disè il miedi, dopo vêlu cusît.
«Parcè?»
«Come perché? Per il calcio del cavallo. Quello che ti ha ridotto così».
«Così cemût?», al fasê il frut, tocjantsi il cerneli. «Ma parcè mi veso fassât?»
Il miedi al clamâ un coleghe.
Le clamin “perdita della memoria a breve termine”.
Nuie di grâf, par solit. Al capite, cuntune bote fuarte tal cjâf. Si visisi dut, fûr che ce che ti è sucedût tes ultimis oris. «Lu tignìn in osservazion fin che i torne», a diserin, intant che Jacop al domandave ce robe che e veve di tornâi e, pe cuinte volte, parcè che lu vevin fassât.
Ma jê, la memorie curte, non tornà.
E cussì, cumò, Jacop si scrîf lis robis par colpe di Rabie.
Bilietus dapardut. Firmâts di lui e scrits par se stes.
Tu âs za mangjât. Tu âs za metût fûr la imondisie. Tu âs za paiât la multe, che tu cjatarâs tal scansel… Jacop si è usât a vivi cussì.
Jal à spiegât ancje a Veronica, devant di un aperitîf, dopo che a àn fevelât di un bot di robis, prin di cjalâle tai voi, cjatâle une vore biele, e domandâi… «Scuse, ma tu, cui sêstu?».
Jê un pôc i crodeve e un pôc no, al chel fantât musan che al platave une cicatrîs sot dal çuf, ma e veve cjolt un tavaiuç di cjarte e daspô di vêlu scrit jal veve metût tal sachetin de cjamese. Lui lu veve cjatât la dì dopo. No jere la sô scriture, ma al veve obedît e si veve cjatât denant di un aperitîf e di une biele fantate. A vevin tacât a fevelâ e… si cjatavin propi ben. Jê, cuant che e veve capît che al jere sincîr, e jere rivade a ôr des lagrimis. Ma si jere fermade li, cence colâ. E i veve scrit un altri biliet, par tornâ a cjatâsi.
La prime volte che si jerin bussâts, savint za che di chei sgrisui si sarès visade dome jê, Veronica si jere intanade tal cjanton de maluserie e i veve domandât: «Ma saraial pussibil che jo o rivi a fâti inamorâ di me ogni dì, partint di zero?»
«Parcè?» i veve rispuindût Jacop, «No isal forsit cussì l’amôr?»
Veroniche lu veve strent a fuart, infondant la muse intor di lui.
Cuant che si jerin distacâts, i veve domandât, come simpri, un altri biliet.

di Milio dai cjans (Vercingetorix)
#1800

2 comments