CC24Novembar#04 – Brusâ il paion

#04 – Brusâ il paion

Mi vignive gomit a viodi chei gamelins plens di ont e di gras dongje dal morâr. E il paion di Santo dongje. Il puar lu vevin sfratât. Dute une vite a lavorâ par chei altris. Simpri di famei o di operari agricul in afit. Al saveve fâ dut. Tu lu clamavis a regolâ lis vacjis, a arâ cul vecjo tratôr Schluter di Bepi ma ancje a sblancjâ. Viodêso chês bufulis pituradis su lis parêts de jentrade de cjase di barbe Rino, che e je tacade a chê dal pai? Lis à fatis propit Santo cul rodul. E dopo ti comedave il tet, al leve a puartâ il lat, al comedave i çocui. Vê un om dal gjenar in cjase e jere une garanzie. Si contentave dome di mangjâ e di durmî e al veve cun se il so paion. Al massim tu i devis cualchi mandule. Tai ultins agns si jere sistemât li dal cont ma une lengate e veve fat di dut par parâlu vie, caluniantlu, e a la fin il cont si jere fidât di Argjie, la sierve, e i veve dât rete. Cussì il puar Santo al jere stât costret a lâ vie cu lis sôs puaris robis: il paion, une valîs di carton leade cul spali, une borace, un pâr di gamelins di ont par fâ cuei.
Al jere in soste tal curtîl de nestre grande cjase coloniche, propit sot dal morâr, sentât par tiere sul so paion.
“Rino” dissal “âstu un puest par fâmi durmî dome une sere? Mi va ben la stale.”
E barbe Rino i veve dit di sì.
Ma la dì dopo nô fruts o vioderin une sene di no crodi. Santo al butà il vueleat sul paion, e ancje un fregul di benzine. Il paion al cjapà fûc.
Il fum neri si alçà. Rino e gno pari no crodevin ai lôr voi.
E Santo ur disè: “Vonde lâ ator pes fameis a domandâ la caritât e un puest par durmî. No us al vevi ancjemò dit: la robe e jere in forsit ma vuê a buinore, cuant che o jeris te braide e jo tal curtîl, al è passât il puestin e mi à consegnât une letare. Gno cusin di Baires mi spiete. Mi à cumbinât un lavôr vêr là jù. Te letare sigurade al jere un assegn di tirâ par paiâmi il viaç. Cul lavôr che o fasarai lu ripaiarai.”
E cussì al fo.
Santo al leve incuintri a une gnove vite, dopo tantis umiliazions. E nol veve lassât debits cun nissun.

di Checo Tam (Derna)
#1799

1 comment