CC24Novembar#01 – Jacume, la mê dindie!

#01 – Jacume, la mê dindie!

Patît frêt e riscjât la vite in Albanie cuant che a rivavin i nemîs nadant sul lât cui pugnâi tai dincj e jo ur sparavi de torete.
Fondât dôs voltis tal mâr de Grecie. La seconde volte mi soi salvât suntun toc di len.
Consegnât ai todescs dopo dal setembar ’43. No volevi fâ l’eroi. Mi àn tignût cun lôr tant che un sierf e no si fidavin a lassâmi lis armis. Po dopo fat presonîr dai titins. E no mi è lade nancje mâl. Intant o durmivi cul gno sac a pêl american, tra la invidie di chei altris. E o jeri svelt jo: ogni ocasion e jere buine par vê alc di plui di mangjâ. Come chê volte che o vevi vierte chê scjatule di cjar americane e o vevi butât mierde parsore par dopo tornâ a sierâ il dut. Po le vevi fate viodi al comissari dal cjamp di presonie, vierzintle devant di lui. Lui mi disè: “Buttare via!”
Cuant che o soi restât di bessôl o ai butât vie dome la mierde ma la cjar me soi mangjade.
O ai passât cualchi timp in Jugoslavie. Bielzà di doi agns il cjavon lu àn copât. No mi displâs. Se o pensi a ducj chei puars muarts in Russie. A mi mi è lade ben a confront.
Bon. De Dalmazie la nestre nâf e steve rivant dongje di Ancone. O stevin par jessi liberâts. Sul fumarûl al jere un manifest di Tito. A pôc di distance de cueste un omenut al voleve tirâ jù il manifest ma jo i ai dit: “Tu, prove a tirâ jù il ritrat di chel che nus à liberâts e jo ti buti jù tal mâr!”
Nol à plui viert bec.
E vie cul tren fin in Friûl! I ultins chilometris fin al miò paîs ju ai fats a pît.
E, jacume la mê dindie! Ju viôt! La mê famee. Dine, cui doi frutins Alido e Orlando. No mi pâr vêr! Mi vegnin dongje. Mi braçolin. A rivin ancje lis agnis, il pai. O sint l’odôr de stale, dulà che a son la Galande, la Adue, la Rome e la Pome. Il profum di cjase. La blave di bati. O soi tornât a cjase mê. Bon, o ai di lavorâ pal cont ma nol impuarte. Baste muarts, baste vueris. La mê vite e je ca!

di Pieri Moràs (Atile)
#1796

2 comments