CC24Otubar#15 – Ce che al reste

#15 – Ce che al reste

Jo mi impensi di chê volte, tornant dal mâr. Si jerin fermâts ta chê sagre che nus someave ireâl, cussì piçule e bessole jenfri cuatri cjasis e lis largjuris di blave tor ator.
Si jerin sentâts a bevi un tai, a mangjâ alc e a cjalâ la int a balâ. E ce graziôs che al jere dut chel movisi a timp, chê dance di ducj, daûr de musiche.
E dut al jere solit, al jere chel: la musiche, la int, la dance.
“Come l’Univiers! – tu vevis dite – Come dut!”
E tu mi vevis slungjade la man par balâ, a mi che di balâ no jeri bon.
“Parcè che al è cussì biel, cussì ninin!”
E cussì o vevin fat, movintsi come che o rivavin, a timp o no, ma ridint, inamorâts.
E dopo, mi impensi, chel aiar che si jere jevât a colp e la musiche che si jere fermade.
La  int e jere scjampade e o jerin restâts di bessôi, intant che i chioscs a sieravin e i musiciscj a ingrumavin i struments.
E al jere come se dut si fos supât vie in une altre dimension, in un altri timp.
Tal cidin, dome l’aiar tes fueis e tai penons de blave.
E jo e te fers, a cjalâ la fin dal Istât, la fin dal mont.
“Lis monts – tu vevis zontât – no si son inacuartis di nuie! Un bal, une vuere, une rose.”
E un lamp, a mostrâ il scarsanâl des robis, il lôr imbramîsi tal simpri, come se la vite e fos dome une polse.
Ae fin, tal scûr, ancje nô o sin scjampâts. E dut al jere daûr. E dut al jere restât, ma nol jere restât nuie.

di Stiefin Morat (Catine la Nere)
#1785

Teme: Angelo Popesso (Il vecchio vigneto)

1 comment