CC24Otubar#14 – Vueit

#14 – Vueit

Charly G. finalmentri al crodeve di jessi rivât a bon. Doi dîs cence medicazion e il cjâf al tornave a funzionâ in clarece. Vonde bausiis di stîl e lizerecis. L’art al sucêt nome cun la energjie dal univiers. Di cuintriponts e emozions. Se nol è cussì a restin nome formis cence vite, colôrs e riis di pinel.
Vonde depression e lamentâsi.
Daspò di dute une gnot di svearole, e cjapât sû par chel concet, si jere jevât di un salt e al è lât dret viers il cuadri che al veve lassât di bande par un mês.  Sì, lu cognosseve pont par pont, ma nome cumò al percepive il vueit, il nuie che al veve fat, platât di colôrs e pineladis te tele, cence significât. Lu veve butât par tiere. E un altri parsore dal prin. E un tierç.
Passade une ore e mieze, une montagne cun dutis lis sôs oparis e blocave il coridôr. Charly G. al jere stât bon di comedâsi parsore di cheste, in front di un cavalet cuntune tele in blanc. Tignînt intune man un pinel e cun chê altre la palete.
Come indiaulât al veve tacât a piturâ frenetic. Il sudôr i bagnave dut il cuarp. Man a man che sintive mancjâ l’aiar al bateve cun pineladis plui fuartis. I doi unics colôrs de palete, neri e ros, si messedavin in maniere strambe parsore de tele.

Biadelore, la montagne e veve cedût e lui al jere colât tal mieç des boris. Cui bregons fumants al veve cjapât sù la tele e si e veve strissinât intun cjanton. Sentât par tiere al cjalave lis ultins vanziduris di fûc e boris, pontave e misurave cul pinel e al piturave dut te tele. Il fum si sgjarnave dentri e fûr de cjase.

La puarte spacade lu veve puartât une altre volte al chi e cumò. I disè a infermîrs e pompîrs: – E je finide. Se o volês o torni a cjapâ lis medisinis. A son parsore di chê stanzie.
E si jere sdrumât jù.

di Zorç Cesaratto (Matungo)
#1784

Teme: Angelo Popesso (le ombre)

2 comments