CC24Otubar#13 – In spiete

#13 – In spiete

Al à voi di un celestin antîc spierdût intun mâr di grispis buinis e lis mans plenis di storiis.
Lis ten in sachete, par pôre che si inglacin.
Ogni tant a trimin di bessolis, tant che chês di so nono Toni.
Pieri al rinsavìs a planc a planc dai ricuarts e al cjale fûr dal barcon de sô cjase.
Un Crist in polse al somee ronfâ sore la montagne. Sul bleon di nêf nancje une çate di mierli ni une muse, une pale, une puarte vierte.
Il so paîs al è bandonât. Al è restât di bessôl in chel che al jere une bomboniere, verde di Istât e di varechine di Invier.
Pieri al è nassût culì e cressût cun sô mari e so fradi zimul.
Fin in chê maladete zornade.
Al smicje, sul mobil scûr de cusine, la fotografie di ducj i trê insiemi.
E la machine nere, lusinte a spieli, la siore impetide, cu la borsete nere, che i domandà a sô mari: “Alore, cuâl tegnie?”
Lagrimis tant che seglots sore il braç slungjât di colp e nissune scuse ni bussade.
Daspò, il machinon al jere partît di sburide, cuvierzint il vaî di so fradi.
Pieri al jere restât unic fi a supâ il sâl dai voi di sô mari e cetante maluserie.
Il timp al veve mangjât lis zornadis, ma Pieri al è ancjemò in spiete di chel fradi robât cence un parcè.
Cjaçadôr di olmis, al imagjine i siei braçs di om vieli e i siei voi, di sigûr di un antîc celestin spierdût intun mâr di grispis buinis.
Tant che i siei, mai stracs di nudrî amôr e sperance di viodilu rivâ e disi: “Mandi, o soi jo.”
Cun juste un floc di nêf su lis ceis braurinis.

di Pierina Gallina (Stele Alpine)
#1782

Teme: Giovanni Pellis, Valbrune

2 comments