CC24Otubar#11 – Bosch

#11 – Bosch

Oh, o ‘nd ai viodudis di ogni a lis esposizions di art!
Di cuant che mi soi metût cun Anute, che e fâs la academie, o ai di seguîle a dutis lis mostris, specialmentri chês di art moderne. Ma jo no capìs nie di art: o soi un furlan sclet. A mi mi plasin lis sculturis di len dal mont contadin che al fâs Remo o lis bocaletis decoradis di Sunte. Chês robis li, po. Ma mi plâs ancje Anute, biele e rosse, cun chei ocjâi di nerd. No si truche ma se lu fasès e si metès lis lints a contat e sarès une figone. Be’ lu è za.
Bon, chê volte che o sin stâts a la Bienâl di Vignesie, o ai sopuartât il paveon polac cun chel mat che al piturave sui cuadris i numars dal zero al infinît e ju recitave ancje, dopo vê regjistrât la sô vôs su tantis cassutis audio che a vignivin riprodusudis suntun stereo.
O ai sopuartât ancje chel bulgar che al veve ordenât a doi pitôrs di corisi daûr intune stanzie a piturâ un lis parêts di neri e chel altri, subit daûr, di blanc. E cussì indevant a straçâ colôr par mês e mês.
Mi soi ancje sentât cence volê suntune bancjine che e à tacât a movisi e jo no savevi che e fos une instalazion!

Ma cumò, ta cheste mostre personâl, la misure e je stade colmade cuant che o ai scrutinât lis oparis: mi àn fat vignî mâl di cjâf.
O pensavi che il pitôr al devi di jessi stât sot de influence di cualchi droghe. Un cuadri in particolâr mi à lassat sberlufît: l’artist al veve pinelât un sofà suntun paviment di marmul devant di une pissine cun figuris stravagantis parsore che non si capive ce che a fossin, a part une che e jere di sigûr un cjan. O ai dit: “Ce boiade!”
E Anute, secjade, mi à rispuindût: “E pensare che fa parte della bellissima serie Bosch…”
“Bosch, chel des cjandelis?” i fâs jo, riduçant.
E jê: “Tu di arte non capisci proprio un cazzo!”
E cumò no à voie di viodimi.
Al jere miôr se mi cusivi la bocje.

di Checo Tam (Derna)
#1780

Teme: opare di Gaetano Klaus Bodanza, serie Bosch

1 comment