CC24Otubar#05 – Monsieur Sbreghebalon

#05 – Monsiuer Sbreghebalon

Al sintive la cjar strenzisi su dut il cuarp, i braçs sfuarçâts jù pe schene, il sanc che i colave jù dai palets ficjâts dentri dal stomi e il cuestam, la smuarse in bocje che no lu lassave respirâ. Il dolôr plui fuart lu sintive tal lenzit, ma no rivave a viodi ce situazion che e jere là jù, il cuel al jere ben strent e no rivave a movilu. Plen di nausee, i vignive di butâ fûr di brut ma al cirive in maniere disperade di stratignî i premits di gomit, spaurît di murî scjafoiât di bessôl.
Chel dolôr par lui al jere vite, al jere plasê e consolazion, al jere gaudie e delizie, snait e libidin: ancje se par meti adun chel sisteme no i jere coventât cuissà ce, nol jere mai rivât a un nivel cussì aprofondît di cognossince dal so cuarp, calcolant gnerf par gnerf, cueste par cueste, vues par vues.
Dut calcolât. Dome une robe no jere lade cemût che al veve pensât: la sô compagne e veve decidût di cjastiâlu propite chê dì e lu veve molât alì. Dut ben, al è compagn, prime o dopo e tornarà, al si jere dit. Invezit cumò nol jere plui tant sigûr, e mancjave di oris e oris e se al finive par rimeti pardabon lui a sarès muart scjafoiât. Monsieur Sbreghebalon, mestri di BDSM, al veve discuvierzût masse tart di no jessi, in fin dai fats, cetant espert e di no jessi nancje Houdini.

di Alessio Ecoretti (Nonio)
#1774

Teme: opare di Gaetano Klaus Bodanza  (San Sebastiano)

1 comment