CC24Otubar#01 – Lavoradôrs furlans di une volte

#01 – Lavoradôrs furlans di une volte

Îr di sere gno fradi mi fâs: – Viôt che doman a buinore al è di lâ in doi cjamps a Borgnan a tajâ la jerbe, che o ai volût tignîle lungje a pueste pes bestiis. Fati cjatâ pront che aes sîs e mieze insiemi a chei altris us meni là cul cjar. A vegnaran ancje Luîs, Toni e Franzilut daûr di nô cu la biciclete. Tu puartiti daûr ancje la falç parcè che jo no ’nd ai a vonde par ducj.
– E tu puarte almancul cuatri flascs di vin, che biel che si lavore si sude e e ven simpri un grum di sêt!
– No stâ a pensâ simpri dome al bevi, brut osteât! O ai za preparât ancje pagnuts cul salam, formadi e mortadele, par fermâsi a mangjâ chê orute a misdì inte ombrene sot dai morârs.
– E parcè no puartâ ancje cualchi fetute di chel persut crût dai tiei che tu tegnis tal fresc in cantine?
– Parcè che al è za biel che finît e no stâ fâmii pensâ parsore! I fruts lu àn lecât di scuindon fete dopo fete e cumò a son restâts dome il vues e la crodie, juste par meti dut tal mignestron…!
– Ahhh! Almancul lôr te le àn petade, no mo?
– Sì sì, però a àn cjapât tantis di chês pidadis tal cûl, chei lazarons!
– Va ben, fradi, ma par mangjâ i pagnuts no bastaràn par ducj dome cuatri flascs di vin, parcè che un mi lu fâs fûr jo di bessôl…
– Ma va là, tu âs tal cjâf dome il vin! Pense invezit a fâ ben il to lavôr, a dâti da fâ come un vêr furlan!
– E ce dovaressio bevi, secont te: la gasose, la spume o magari chê robe che ti plâs a ti: la ”Idrolitina”? Mi vegnin i sgrisui dome a pensâ a dutis chês bufulis inte tace…
Ma a la fin o preferis tasê e no lâ plui indenant cul discors, però no pues fâ di mancul di pensâ tra me e me: – Jo o sarai ancje vedran e come un bon furlan i doi dentri cul vin, però di Vinars, cuant che tu tu vâs al marcjât a vendi pomis e verdure, cui consolie ogni volte la tô femine, che si sint simpri cussì sole e trascurade? Va ben che al reste pûr dut in famee, ma insome… Continue a bevi la Idrolitina tu, e copiti di lavôr…
A la fin de zornade in efiets o vin fat ducj un grant biel lavoron; gno fradi al è sodisfat e nus mene a cjase content.
– Sint un pôc, fradi, nol è che sedi vanzât ancjemò un got di blanc?
– Ma fale finide, che ti puce ancjemò il flât, di tant che tu âs parât jù!
– Va ben, va ben, però di cumò in poi alore ti clamarai “Gasose”!

di Renzo Turùs (Chel di Cormons)
#1770

Teme: opare di Giuseppe Zigaina (i braccianti, 1952)

2 comments