CC22Otubar#12 – Il prin svol

#12 – Il prin svol

Pat Alekseevna e jere une pilote navigade e multipremiade.
E veve svolât da cuant che e jere une fantate.
Sô mari e so pari a vevin une piçule aviosuperfiç inte Basse e par jê stâ di sore o di sot dal avion al jere la stesse robe: e veve viodût justâ tancj velivui lizêrs, e veve dât i imprescj, e veve cjalât i avions cori par jevâsi sù e svolâ intal aiar, poiâsi o vignî jù cuntune sdramassade su che striche lungje.
Daspò e jere lade intun altri paîs a studiâ par abilitâsi tai avions plui grancj deventânt, dopo une vore di oris di svôl, Prin Comandant.
Il so favorît al jere il traspuart di marcjanzie oltriocean: cinc personis imbarcjadis su di un pachidermi alât. Al pareve cuasi une astronâf  e lor a svolavin su distancis grandononis passant tal mieç di nûi, temporâi, glace ma ancje vastitât di lusôr di soreli.
E tignive i voi atents sui dâts de strumentazion. Si jere butade inplen in chel progjet: testâ l’avion ipersonic, rivâ a Gnove York in mancul di une ore partint da Rome. Oris e oris di simulatôr. Dîs e gnots passâts a studiâ il manuâl e a esercitâsi su tratis curtis. Ma vuê si provavin ducj i 6885 km.
Al rivà il vie libare de tor di control. Al jere il moment di screà il prin svôl.
E metè di bande la emozion grandonone e e deventà une robe sole cun la Venus Ramjet 2000!

di Alessia Meacci, Patrizia Torossi (Incocalît)
#1781

Teme: Tullio Crali (incuneandosi nell’abitato, 1939)

1 comment