CC24Otubar#03 – Sante Pupe

#03 – Sante Pupe

Omnino fabulosa, mi vevin dit che sante Pupe e jere omnino fabulosa. Ma provait vualtris a cori di scjampon cun barbe Gjildo che us cor daûr cu la roncee in man, lazaron che tu mi robis lis mês nolis! Us vignarès voie, tant che a mi, di preâle cul flât crevât, sante Pupe, salvimi! Sù pe rampe dal rapâr de Tôr, jù di chê altre bande, fin dentri intal glereon simpri di corse e lis blestemis di Gjildo saldo daûr! La aghe de ultime plene e à lassât une sorte di piçule splaze di savalon sutîl e umid, ma cui lu viodie! Dentri jo, dret tant che intun savalon mobil dal desert. O soi pierdût, no rivi a tirâ fûr i pîts, o ai za rot un çocul e cumò? Fabulosa o no, sante Pupe, cumò ti tocje fâ chest miracul!
E il miracul sante Pupe lu fâs. Cun cincsesstante agns di ritart, e no propi chel miracul lì, ma insome!
Cheste volte i noglârs a son miei, nissune pôre di nissune roncee! Ma nolis, nuie. Chês cuatri scotadis che o rivi a cjatâ par tiere o che a son sbusadis o che a son vueidis.
Cenonè une dì o soi cui nevoduts di chês bandis. E ur conti di sante Pupe e di barbe Gjldo e de sô roncee. E di tropis che o vevi cjapadis. No nolis, pachis!
“Nono, veh une nole biele” E sarà sbusade, e sarà vueide. No je sbusade e no je vueide.
O rivin a cjase ducj i cuatri culis sachetis e lis baretis plenis. “Mastiâilis ben, eh! fruts, che us vadin di stuart!”.
Buinis. Sanis. Brave sante Pupe! Sante Pupe, fruts, e je une sante che e fâs i miracui, viodeso ce sorte miracul, di fânus cjatâ dutis chestis nolis buinis, che fin îr no jerin. E je omnino fabulosa, ma, però, cussì, duncje e je une Santone!
“Ma, nono, alore parcè in chê volte là, che tu jeris frut, che tu scjampavis, parcè no ti aie fat in chê volte là il miracul?”
Eh! Ce voleso! A son fruts, e si sa che i fruts no capissin!

di Laurin Zuan Nardin (Ippogrifo)
#1772

Teme: opare di Giovanni da Udine

1 comment