CorseCurteSetembar#22 – La ultime butilie

#22 – La ultime butilie

Cun vuê o ai finît, cheste e je propit la ultime. La ultime butilie.
No, nol è cul alcul che o ai voie di finîle. Ca vie, su la Isule di Sorevint, di alcul no ‘nd è.
Ancje se, cuant che o soi rivât, un tic di spirt al varès zovât par fâmi cûr. Naufragât dopo la plui fuarte burascje che si sedi mai viodude tal Mâr dai Sargàs, e cence savê nuie dal rest dal ecuipaç: ancje oms che su la tiere ferme a somein salts e sigûrs a podaressin disperâ.
Ma no jo. Jo no. No vevi nissune intenzion di murî, e mi soi tacât ae vite tant che un mussul tal scoi.
Proviodi al mangjâ e al bevi al cjape la plui part des mês zornadis: cjapâ masanetis e capis, impiâ il fûc, lâ a cjoli la aghe te uniche risultive disponibile… ma o esplori ancje la isule. Cumò e je dal dut bandonade, ma si dîs che a sedin stâts i piratis a scuvierzile par prins, e cuissà che no vedin lassât alc che al pues tornâ util.
Un dì o viôt un lusarili tal savalon… Nol jere lusôr di doblons di aur, dome une vecje butilie vueide, di rum forsit, che cualchi pirate al veve butade vie dopo vê fat fieste par un assalt une vore frutifar.
Sul moment la ai butade vie ancje jo. No sai parcè che o soi tornât indaûr a cjolile.
Le ai tignude cun me par un pôcs di dîs: e jere la uniche robe fate dal om che o vevi cjatade, e cjalâle mi faseve sintî ancjemò part dal gjenar uman.
La idee di scrivi mi è vignude dopo, cuant che o ai cjatât il savût, un boscut di savût di chê altre bande de isule. E mi soi visât di alc let intun libri su la Ete di Mieç: che une volte, secui indaûr, si doprave il savût par fâ l’ingjustri. Cun chel o ai scrit il prin messaç suntune fuee di bananâr e lu ai spedît. Ma vûstu che i piratis si incjochin di bessôi? Po no po, di fat o soi tornât là, o ai sgjavât tal savalon e di butiliis a ‘nd jere un grum.
Cun pazience o ai scrit tancj messaçs, par fâmi cjatâ ma ancje par contâ la mê storie, se no ves di rivâ a resisti avonde a lunc.
Ma cumò lis butiliis a son finidis. Al vûl savût par fâ messaçs, ma chest al è propit l’ultin. Se lu vês cjatât, vignît a salvâmi.
Jo o resist.

Vuestri
Erman di Nantucket

di Stralunade (Atletic Gjatui)
#1380