CorseCurteOtubar#15 – Pôreroi

#15 – Pôreroi

Cence vê a clâr cemût e di dulà ogni tant e vignive parade indaûr di un alc interni che la obleave a restâ ferme dal dût, blocade. Fin ca si pues tirâ fûr che la pôre e veve pardabon condizionade dute la sô esistence.

E jere nassude intune cjasade di sorestants dulà che si veve dispatussade in maniere strissinide vie pe une infanzie di isolament. Cence un vincul vêr, di solit e vignive tignude a ments dome par baiaressis. Par agns i siei gjenitôrs a vevin fat i diplomatics ator pal mont e la sole robe che i vevin lassade e jere une siore ereditât.
Cumò a trentecinc agns e di bessole e passave i dîs e lis gnots drindulant in ambients di biele int, straplens di pucefadiis che tant che jê a gjoldevin de fortune des lôr fameis.
Biel a pueste, intune di chês adunadis de alte societât i si svicinà un personaç che no veve mai viodût, un francês che al dave jù di vê cognossût i siei gjenitôrs a Parîs cuant che a vevin une incjarie te ambassade. Chê e fo la prime tabaiade, un intop che subit al capità intun rapuart di amicizie che cul timp al colâ in matrimoni.
Sù par jù e veve cjatât un saponte che i dave dute la sigurece par distacâsi de pôre. Lui, tant che un professionist, al saveve scoltâle e dâi simpri lis justis, al incjarnave une sorte di eroi che le veve liberade dal mostri dai timôrs.

Cumó cence pôre di svolâ a tacarin a zirâ ator pal mont, grandis citâts plenis di int e isulutis vueidis dulà che si fermavin par setemanis. E fo propit li, intune oasi dulà che la veretât e vignì fûr.
Par câs e scuvierzè che lui al jere un cjaçadôr di fortunis, un farisaic che al veve cognossût i siei gjenitôrs a Parîs dulà che i vevin fat savê di vê une fie une vore malinconiche che no cjatave il dret. Lui, intant che al scoltave la lôr storie, al tramaiave la sô gnove fature.

Magari cussì no in chê isule e viodè la sô ultime lûs. La pôre che simpri i veve dât segnâi di no lâ indevant, cumò gjavade vie, i veve fat pierdi la sô fortune e i vevin fat la fieste.

di ***
#1***

 

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît