CorseCurteSetembar#07 – Blecs

#07 – Blecs

Carli al jentrà te barache e si fermà devant dal murel di imprescj cun sfuei in blanc e lapis. Il martiel al someave il plui facil. Lu dissegnà adun a une vecje tanaie, smenteade intun cjanton.
In pôcs minûts si stufà dal compit e al lassà il sfuei in bande. Al cjapà il mani dal torcul cuntune man par bande zuiant a fâ fente che al svolave un cjace. Cuant che si inclinà par fâ svoi in picade al scuvierzè un piçul scanselut platât disot de taule di marangon.
Lu vierzè cun sfuarç e dibot e cjapà la sô atenzion un lustri ûf di len metût intun cjanton, come se al fos dismenteât jenfri scjatulis di vîts, dadui e scjonelis. Lu cjapà jenfri lis sôs mans e al sintì la sô delicatece. Al stave lant daûr des venis scuris cuant che al comparì un non intaiât in zentîl scriture corsive: Marie.
L’odôr di fum i ricuardà che so pari al jere là di fûr a brusâ scovacis. Al le di corse viers di lui mostrantji la sô scuvierte, e prime che al podès domandâi alc, so pari i rispuindè: – Chel si meteve dentri dai cjalçuts sbusâts par podê gasiâju.
A Carli i someà che la rispueste no fos che juste. “Al è un non” i disè, e al slungjà la man. Il pari lu cjapà e al tacà a ricuardâ, stant cidin.
– Cui ise Marie?
– Une che e veve di vignî de Italie ma no je vignude – al rispuindè il pari cence gjavâ la voglade dal non.
– E parcè no je vignude, tate?
Il pari al tornà il ûf e al à rispuindè a fîl di vôs: – Prime no podeve, plui indevant no voleve.
Daspò di chel tramont, nol tornà mai plui a sintî chê vôs rote, ni a viodi chei voi umits. Si voltà par meti adun lis boris cu la pale. Carli al restà in spiete.
I comandà intun lunc suspîr: – Torne a meti chê robe dulà che e jere! Dibot!
Viers la barache il frut al viodè par il barcon sô mari che e prontave la cene; al jentrà te cusine, si fermà cul ûf inte palme vierte e cjalantle tai voi i domandà: – Dimi mame, se tu tu ti fossis clamadet Marie, e tu gasiassis cjalçuts, e tu fossis vignude de Italie, jo o varessio di jessi stât un altri?