#09 – Emozion di poesie
«O vuei regalâti un tramont a cost di robâlu dal cîl. O vuei regalâti un tramont, che mi feveli di te» al cjante Sdrindule, intune maniere une vore sintude, la famose cjançon di Driussi.
Mi plâs une vore sintîle: e je profumade di poesie.
Mi fâs pensâ a lis mês zornadis: chês vivudis sot di une sfilzade cjalde e a chês altris cuntun sôl pont a crôs.
E ai amonts.
A che viodûts ator pal mont e chei altris a cjase me, intal gno Friul: a Cjamin al Tiliment, i plui sflandorôs, di sigûr.
Cuant che il cîl al bruse di gjonde e al fâs gratâ la gole e ingropâ il flât, ma, simpri, cun agrât.
Par ogni robe: par la vite, par i voi, par il cûr dolç, par la lusigne d’Istât, pal fî cjapât sù intal figâr.
No, no baste la fotografie a fâju rimirâ compagn, i amonts!
Coventin dome i miei voi e il cûr in svual, cetant content devant a chei miracui di Mari Nature.
Ma, ce isal, mai, un Amont?
Un finî di zornade, un pinsîr di maluserie e di pôre che e rivi la siôre in scûr a cjolimi par puartâmi lontan, dulà che il soreli nol va ni a mont ni al nas plui, par me.
Cun chei pinsîrs, i voi si bagnin, ma si inluminin denant di tante bielece.
Nancje un pitôr al rive a fâ compagn: i siei pinei no àn mai cjatât i colôrs perfets.
“Dome cui che al cjale al viôt”, o pensi jo.
Chel moment, cuant che la gnot e ven piturade dal soreli, e je magjie estreme, come cuant che il fîl de vite al ricame l’amôr.
E i voi a àn fan, come la bocje, vierte come un ûf a cirî lis peraulis justis.
Che no vegnin fûr, parcè che si ingropin in tal cûr.
E, culì, si taponin, fin doman!
di Pierina Gallina (Gjaline Padoane)pie
#1342
5 comments On CorseCurteAvost#09 – Emozions di poesie
L’ amont, piturât cussi ben cui pinei dal cûr, cun tante sensibilitât umane che no si po fa di miôr, che biele cjançon di Driuss . Lussian
Pingback: FANTACORSECURTE – ZURIE DAI LETÔRS – AVOST 2022 | Contecurte ()
Mi par che jere cjantade di Sdrindule
in efiets se si lei la conte al è scrit tes primis riis 🙂
Pingback: CorseCurte – La Classifiche di Avost | Contecurte ()