CorseCurteJugn#22 – I miei vincj agns

#22 – I miei vincj agns

Timp? Ma cuâl timp: no si rive adore a dîlu, che za al è scjampât. Di chest an uficialmentri no soi plui un teenager. Un fantacin, par dîlu par furlan.
Masse voltis o ai vût pensât di non vê vivût te miôr maniere chescj miei prins vincj agns.
Al risulte simpri une vore facil fâ i paragons cu la vite di chei altris, di chei de mê etât che lis cazadis lis fasin cence nancje pensâ masse; che, come che al è just, si scuindin daûr de etât par fâ ‘ndi simpri une. Par vivi, come che a disin lôr.
Ben, jo fin cumò no ai mai rivât a sbassâmi a chel nivel. Aio resons par pintîmi? Forsit.
La mê amie, che no par nuie e studie di psicolighe, e à clare la situazion. E continue a dîmi che no si à di tornâ sore ce che al è stât, parcè che se si à vivût intune cierte maniere, al vûl nome dî che chê e jere la maniere che si crodeve la miôr. E alore aio fat in ogni câs ben?
Jê mi dîs che no ai vude dibisugne di vivi ciertis esperiencis parcè che il gno jessi plui grant di cjâf mi faseve za cussient di ce che chê esperience mi varès dât.
Ce ingredei.
Sì, amie, però mi somee come se alc mi mancje istès. Chê sensazion di vêle cumbinade, di provâ in prime persone cemût che e je lade, ancje se o podevi savêlu in partence. O ai simpri cirût di valutâ lis robiis di un altri pont di viste, dal sigûr no di un de mê etât; e chest mi à frenât in plui di une ocasion.
Cualchidun al dîs che al sarès biel vivi chescj nestris agns cun la cussience di un di trente. O ai cualchi dubi…
Ma se e je une robe che o voi dacuardi cu la mê psico-amie, chê e je che al sarès stât cetant plui biel e emozionant vivi tune altre epoche. Agns 2000? Ma par plasê… miôr i agns Setante, Otante…
In chei timps sì che al jere dut plui facil! E la libertât lôr e jere plui grande; la nestre di vuê e je nome une ilusion.
Che po no je nancje colpe mê se un rapper mi fâs voltâ il stomi e se o vai cun Loretta Goggi, Anna Oxa, Marcella Bella o i ABBA. O sarai nassût pardabon tal moment sbaliât…

di ***

1 coments On CorseCurteJugn#22 – I miei vincj agns

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît